Londonda Heydər Əliyevin 91 illiyi ilə bağlı tədbir keçirilib
10 May 2014 14:00 (UTC+04:00)
Azərbaycanın Böyük Britaniyadakı səfirliyində ulu
öndər Heydər Əliyevin anadan olmasının 91-ci ildönümünə həsr
olunmuş tədbir keçirilib.
Movqe.az xəbər verir ki , tədbirdə səfirliyin
əməkdaşları, Azərbaycan diasporunun, yerli və xarici ictimaiyyətin
nümayəndələri iştirak ediblər.
Azərbaycanın Böyük Britaniyadakı səfiri Fəxrəddin
Qurbanov ümummilli lider Heydər Əliyevin həyat və fəaliyyətindən,
müstəqilliyimizin möhkəmlənməsində, ölkəmizdə demokratik, hüquqi,
dünyəvi dövlət quruculuğunda, sabitliyin bərqərar olunmasındakı
misilsiz xidmətlərindən bəhs edib. Bildirilib ki, milli dövlətçilik
tariximizin əbədi şöhrətinə çevrilmiş dahi şəxsiyyət Heydər Əliyev
hər bir vətənpərvər azərbaycanlının qəlbində sadəliyi, səmimiliyi,
alicənablığı, vətənsevərliyi və digər yüksək insani keyfiyyətləri
ilə unudulmaz izlər buraxıb. Ulu Öndərin sarsılmaz iradəsi və
qətiyyəti, xalqın tərəqqisi yolunda yorulmaq bilmədən çalışması,
fədakar əməyi sayəsində müasir müstəqil Azərbaycan inkişaf yoluna
çıxıb və Prezident İlham Əliyevin rəhbərliyi ilə bölgənin lider
dövlətinə, beynəlxalq aləmdə söz və nüfuz sahibinə
çevrilib.
Diplomat, bu il eyni zamanda, bir sıra layihələri
uğurla gerçəkləşdirən, mühüm xeyriyyəçilik fəaliyyəti və cəmiyyətə
layiqli xidmətləri ilə seçilən Heydər Əliyev Fondunun
yaradılmasının 10 ilinin tamam olduğunu diqqətə
çatdırıb.
Səfir həmçinin, Britaniya-Azərbaycan
münasibətlərinə toxunub, ölkələrimiz arasında diplomatik əlaqələrin
qurulmasının məhz ulu öndərin adı ilə bağlı olduğunu
vurğulayıb.
Daha sonra tədbir iştirakçıları ulu öndər Heydər
Əliyevin siyasi fəaliyyətindən bəhs edən videoçarxa
baxıblar.
Mərasim salonunda Ümummilli Liderin həyat və
faliyyətindən bəhs edən kitablar və fotosərgi nümayiş
etdirilib.
