Azərbaycanda 3 yaşlı uşağın mazut çalasına düşərək boğulması ilə bağlı cinayət işi başlanıb

4 İyun 2014 17:07 (UTC+04:00)

Baş Prokurorluq Astarada azyaşlı uşağın mazut çalasına düşərək ölməsi barədə məlumat yayıb.


Baş Prokurorluğun mətbuat xidmətindən APA-ya verilən məlumatda bildirilir ki, iyunun 3-də Astara şəhər sakini, 2011-ci il təvəllüdlü Babazadə Ədalət Hikayət oğlu rayon mərkəzi xəstəxanasının həyətində mazut çalasına düşərək vəfat edib.

 

Bu barədə daxil olmuş məlumat əsasında rayon prokurorluğu və Polis Şöbəsinin əməkdaşları dərhal həmin ünvana gedərək hadisə yerinə və meyitə məhkəmə-tibb ekspertinin iştirakı ilə baxış keçiriblər.

 

İlkin araşdırmalarla müəyyən edilib ki, hadisə baş verən sahə əvvəllər xəstəxananın isitmə qurğuları üçün torpağın altında tikilmiş mazutun saxlandığı yer olub. 2012-ci ilin mart ayında "Real" mənzil-tikinti kooperativi tərəfindən xəstəxanada əsaslı təmir işləri aparılarkən həmin ərazinin üst hissəsinə torpaq tökülərək yaşıllıq zolağı salınıb.

 

Qeyd edilən tarixdə Ə. Babazadə anası ilə xəstəxanaya gəlib və orada oynayarkən yaşıl ot örtüyü çökdüyündən içərisində mazut olan çalaya düşüb, boğularaq ölüb.

 

Faktla bağlı rayon prokurorluğunda Cinayət Məcəlləsinin 314.2-ci (səhlənkarlıq ehtiyatsızlıqdan zərərçəkmiş şəxsin ölümünə və digər ağır nəticələrə səbəb olduqda) maddəsi ilə cinayət işi başlanıb. İş üzrə məhkəmə-tibbi ekspertizası təyin edilib və digər istintaq hərəkətləri yerinə yetirilib.

 

Hazırda iş üzrə zəruri istintaq tədbirləri davam etdirilir.