Ərizə qəbulunun vaxtı uzadıldı
12 İyun 2014 18:15 (UTC+04:00)
Tələbə Qəbulu üzrə Dövlət Komissiyası (TQDK)
tərəfindən ümumi orta təhsil bazasında (9 illik) orta ixtisas
təhsili müəssisələrinə mayın 12-dən etibarən başlanmış və iyunun
12-də başa çatdırılması nəzərdə tutulan ərizə qəbulunun vaxtı
uzadılıb. TQDK-dan Movqe.az-a verilən
məlumata görə, cari ilin məzunu olan şagirdlər üçün ümumi orta
təhsil bazasında (9 illik) orta ixtisas təhsili müəssisələrinə
qəbul buraxılış imtahanlarının nəticələri əsasında aparılacaq və bu
məzunlar kolleclərə əlavə imtahan
verməyəcək. Əvvəlki illərin məzunları
üçün isə qəbul imtahanları iyunun 29-da aparılacaqdır. Əvvəlki
illərin məzunu olan gənclərin imtahan mərkəzləri üzrə bölgüsünü
təşkil etmək və digər çoxsaylı hazırlıq işləri ilə əlaqədar olaraq
ərizələrinin qəbulu iyunun 13-də başa
çatacaq. Belə ki, ümumi orta təhsil
müəssisələrini əvvəlki illərdə bitirən və elektron ərizələrini
Sənəd Qəbulu Komissiyasında (SQK) təsdiq etdirməli olan məzunlar
tələb olunan sənədləri təqdim etməklə 13 iyun saat 17:00-dək SQK-ya
müraciət edə bilərlər. Əvvəlki illərin
məzunu olan və elektron ərizələrini internetlə özləri təsdiq etmək
imkanına malik olan gənclər üçün son müddət 13 iyun saat
23:59-dur. Əvvəlki illərin məzunları
üçün orta ixtisas təhsili müəssisələrinə qəbul imtahanları iyunun
29-da aparılacaq. Odur ki, ümumi orta təhsil müəssisələrinin 9-cu
sinifini 2014-cü ildə bitirən şagirdlər üçün isə ərizə qəbulunun
son müddəti 30 iyun saat 23:59 müəyyən olunmuşdur. Qeyd edək ki,
həmin gənclər ərizələrini SQK-ya müraciət etmədən internetlə özləri
təsdiq edə bilərlər.