Qafqazın və Uzaq Şərqin islam liderləri bir araya gəldi (VİDEO)
15 İyun 2014 14:01 (UTC+04:00)
Tatarların əcdadı kimi tanınan Volqa bulqarlarının
İslamı qəbul etməsi münasibətilə Tatarıstanın Bulqar şəhərində
Qafqazın və Uzaq Şərqin islam liderləri bir araya
gəldi.
Movqe.az ANS TV-ə istinadən xəbər verir ki, Bulqar
şəhərində təşkil olunmuş mərasimdə Tatarıstanın prezidenti Rüstəm
Minnixanov, Dövlət məsləhətçisi Mintimer Şaymiyev, Rusiya
Müsəlmanları Mərkəzi Dini İdarəsinin rəhbəri Talqat Tacəddin və
digər səlahiyyətli nümayəndələr iştirak
edib.
Təntənəli mərasimə Qazaxıstan, Qırğızıstan,
Ukrayna, Belarus ölkələrinin dini liderləri və ərəb ölkələrinin
səfirləri də qatılmışdı. Əvvəlcə Ağ məscid adlanan yerdə toplanan
liderlər islam və türk dünyası ölkələrinin əməkdaşlıq məsələlərini
müzakirə etdilər. Bütün Qafqazın Şeyxi Hacı Allahşükür Paşazadənin
iştirakı ilə keçirilən tədbirlər Tatarıstanın Volqa Bulqar
şəhərində islamın qəbul olunmasının ildönümünə həsr
olunmuşdu.
Bulqar şəhərində yerləşən dini-tarixi muzeyi
ziyarət edən liderlər burada islam dininə aid müxtəlif maraqlı
esponatlarla tanış oldular. Muzeydə tarixi sənədlər, Qurani-Kərimin
əlyazması və digər dini əsərləri görmək mümkündür. Muzey qarşısında
təşkil olunmuş təntənəli mərasimdə çıxış edən Bütün Qafqazın Şeyxi
Hacı Allahşükür Paşazadə islam birliyinin əbədi olduğunu deyərək
bütün ölkələri fəal əməkdaşlığa çağırdı. O, tatar xalqının islamın
inkişafına verdiyi töhfələrdən də söhbət açdı.
Təntənəli mərasimlər daha sonra Bulqar şəhərində
ənənəvi olaraq qurulan çadırlarda davam etdirildi. Böyük Bulqar
Xanlığının 640-cı ildə xəzərlər tərəfindən süqutundan sonra iki
qola ayrılan bulqarlar cənub-qərbə və şimala köç ediblər. Qərbə
gedən qol xristianlığı seçərək Balkan yarımadasında Bolqarıstanın
əsasını qoymuş, şimala köçən qol da Kotrak xanın rəhbərliyi altında
Volqa çayı sahilində İdil-Bulqar dövlətini qurub. Volqa
bulqarlarının 889-cu ildə Qaraxanlılardan əvvəl İslamı qəbul edən
ilk türk xalqı olduğu iddia edilir.