Doğru bildiyimiz yanlışlar...
15 İyun 2014 19:00 (UTC+04:00)
Sağlam qidalanmağın mühümlüyü barədə bütün
həkimlər danışırlar. İtalyan alimlər isə sağlam qidalanmağı üstün
tutanların həyat tərzini araşdırıb, onların səhvlərini ortaya
çıxarıblar.
Movqe.az Milli.az-a istinadən xəbər verir ki ,
onlar bu işdə beş yanlışı ayırd ediblər. Yəni öncə insan nədənsə
imtina etməklə bunlara öyrəşir, guya həyatı sağlamlaşır, sonra isə
həmin rasion onun orqanizminin bəzi funksiyalarını pozmaqla başına
oyun açır.
1.Çörəkdən tam imtina. Çörəyin tərkibindəki, artıq
çəkinin yığılmasına kömək edən karbohidratların olması insanları bu
həddə çatdırır. Yalnız dietoloqların fikrincə, ən yaxşı pəhriz elə
Aralıq dənizi pəhrizidir ki, onun da tərkibində çörək var. Həmin
çörək buğdanın bərk növlərindən hazırlanır. Əgər un məhsulunun
tərkibində bərk buğda növləri, kəpək, bitki sellülozası, bütöv
buğda göstərilibsə, deməli ki, əlinizdəki orqanizminiz üçün çox
faydalı məhsuldur. Eyni qayda makaron məhsullarına da
aiddir.
2.Yalnız yağsız süd məhsullarından istifadə.
Adamları buna vadar edən belə bir fikirdir ki, südün tərkibindəki
yağ bir çox xəstəlikləri, o cümlədən ürək-damar mərəzlərini
yaradır, üstəlik, adamı kökəldir. Ancaq unutmaq lazım deyil ki,
südün tərkibindəki faydalı maddələr elə həmin yağla həzm olunur.
Yəni ki, yağsız süd məhsulları yeməklə yediyinizin faydasını sıfıra
endirirsiz. Optimal variant aşağı yağ faizli süd məhsullarından
(2,5% və daha az), yaxud yağın bitki əsaslı doymamış yağ turşuları
ilə əvəzləndiyi məhsullardan istifadə
etməkdir.
3.Diabetiklər üçün ərzaqlardan istifadə. Bu da
yenə də arıqlamaq həvəsi ilə izah olunur. Yalnız diabetik qida çox
spesifikdir.
Bəzən o, kaloriliyinə görə sağlam adamlar üçün
olan analoji qidanı qat-qat geridə qoyur (burada diabetiklərə
faydalılıq effekti həmin qidaların tərkibindəki transyağlarla əldə
olunur, həmin transyağlar insulinə qarşı həssaslığı
bloklayır).
Şəkər əvəzediciləri də sağlam insanlar üçün dərman
deyil (bu barədə növbəti bölmədə). Yəni həkim təyin etmədiyi halda
diabetiklər üçün olan ərzaqlardan istifadə etməyin, ya da heç
olmazsa, üzərində "tərkibində transyağlar yoxdur" qeydi olan
məhsulları alın.
4.Şəkərdən və duzdan tam imtina. Öz dozasında
bunlar orqanizm üçün vacibdir. Onlar ürək-damar və limfatik
sistemin normal fəaliyyətində iştirak edir. İstifadəni minimuma
endirmək olar, amma onlardan tam imtina çox zərərlidir. Sonuncu,
əslində, tam olaraq mümkün də deyil, çünki hazırda fabriklərdə
istehsal olunan məhsulların əksəriyyətində duz da, şəkər də var,
amma dadı heç bilinmir də.
5.Qablaşdırılmış şirələrə meyl. Çoxları elə
bilirlər ki, qablaşdırmalarda olan şirələr təbii meyvələrdəki
vitaminin deposudur. Əslində isə onlar sadəcə olaraq təbii şəkərin
çox, bitki sellülozasının isə minimum həddə olduğu
konsentratdır.
Qablaşdırılmış şirələri təzə sıxılmış meyvə
şirələri ilə müqayisə etmək düzgün deyil. Üstəlik, hətta təzə
sıxılmış şirələri də dietoloqlar bərabər nisbətdə su ilə qarışdırıb
içməyi və gündə 200 ml həddi aşmamağı məsləhət
bilirlər.