Bakının mərkəzi küçələrindən biri bağlandı

18 İyun 2014 11:31 (UTC+04:00)

Bu gün Bakının mərkəzi küçələrindən birində nəqliyyatın hərəkəti məhdudlaşdırılıb.


Bunu "APA-Economics"ə Nəqliyyat Nazirliyi "Azəryolservis" ASC-nin mətbuat xidmətinin rəhbəri Pünhan Mürsəliyev bildirib.

 

Ötən gün saat 23:00-da Həsən Əliyev küçəsinin Cəlil Məmmədquluzadə küçəsi ilə kəsişməsindən Azər Əliyev küçəsi ilə kəsişməsinədək olan hissəsi bağlanıb.

 

Həmin ərazidə kommunikasiya xətləri üçün qazılmış xəndəklər lazımi materiallarla doldurulduqdan sonra, kipləşdirmə işləri aparılacaq. Həmçinin beton bordürlər mərmər bordürlərlə əvəz ediləcək.

 

Köhnə asfalt-beton örtüyü frez mexanizmi vasitəsilə qaşınaraq yenisi ilə əvəz olunacaq.

 

Bütün işlər 7-10 gün müddətində yekunlaşacaq.