İLHAM ƏLİYEV, Azərbaycan Respublikasının Prezidenti.
4 sentyabr 2014-cü ildə Masallı ictimaiyyətinin nümayəndələri ilə görüşdəki çıxışından:
"Masallı rayonu da Azərbaycanın ümumi inkişafında həmişə xüsusi yer tutur. Burada vətənpərvər insanlar yaşayır...
Son 10 il ərzində mən Masallıda dəfələrlə olmuşam. Bu, mənim səkkizinci səfərimdir. Demək olar ki, hər il gəlirəm və hər il müxtəlif açılışlarda iştirak edirəm. Sevinirəm ki, açılışların sayı artır və vaxtilə verilmiş qərarlar nəticə verir, gözəl səmərə verir. Masallıda son illər ərzində böyük işlər görülmüşdür. Bu gün də bu işlər davam etdirilir. Xüsusilə, rayonun infrastrukturu ilə bağlı layihələr uğurla icra edilir. Yol tikintisi sürətlə gedir, kənd yolları tikilir. Masallıda 100-dən çox kənd vardır. Çox vacib layihədir. Çünki kənd yolu kənddə yaşayan insanlar üçün əsas məsələdir. Biz, əlbəttə ki, ilk növbədə magistral yolların çəkilişi ilə bağlı qərarlarımızı vermişik. İndi isə kənd yollarının çəkilişinin növbəsi gəlib və Masallıda bu layihələr geniş vüsət almışdır. Yaxın aylarda müasir xəstəxana olacaqdır..."
xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx
"...O günlər xatirəmdə əbədi qalmışdır...
Masallı torpağı yurdumuzun laləzər guşələrindən biridir. Burda təbiət ilin bütün çağlarında gözəldir. Əbədi yaşıllığa bürünmüş sıra dağlar, güllü-çiçəkli yamaclar, tarixin yaşıdı dəmirağaclı, palıdlı meşələr, qayalardan süzülən şır-şır bulaqlar, min bir dərdin dərmanı "İstisu" kurortu, limonlu, portağallı bağları, bağçalrı Masallının hüsnünə ilhi bir yaraşıqdır.
Deyirlər təbiəti, iqlimi gözəl olan yerin adamları da gözəl və istiqanlı olurlar. Axı, biz insanlar da bizi əhatə edən təbiətin bir hissəsiyik. Bu mənada masallılar həm xaricən həm də daxilən gözəl, səmimi, istiqnlıdırlar. Mənim Masallıdan olan xeyli dostlarım vardır. Onlarla görüşəndə mən qəlbən və ruhən yüngülləşirəm...
Nəriman Həsənzadə - Azərbaycanın Xalq şairi.
xxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxxx
" ...Doğulduğum Yardımlı rayonu mənim doğma ocağım, Masallı isə məni böyük dünya ilə bağlayan ilk keçdiyim körpüdür. Viləş çayı üzərindən bir körpü salınıb.
Masallı torpağı sözü bütöv adamları ilə yaddaşıma əbədi olaraq hopub. Masallıdan dostlar qazandım. Masallı kəndlərinin hər birində onlarla yaxınım, tanışım var.
Masallı camaatı heç vaxt mənə qarşı ayrı-seçkilik salmayıb, mənə yerli, eloğlu kimi baxıb. Həm yaxşı, həm də pis günlərimdə mənimlə birgə olublar, məni dəstəkləyiblər. Bakıda başım ağrıyan kimi oradan əks-səda eşitmişəm. Qayadan qaynaya-qaynaya Viləş çayına tökülən suda hətta qışın oğlan çağında belə çimmək olar. Allah belə gözəl nemətləri verib Masallıya.
Tez-tez Bakıdakı yorğunluğumu çıxarmaq üçün rayona yollanıram. Yolüstü mütləq Masallıda dayanıram. Bir stəkan çay içirəm. Vaxtım olanda yol qırağındakı palıd meşələrinin arasında bir tikə çörək yeyirəm. Yeri gəlmişkən qeyd edim ki, Masallı mətbəxi əvəzsizdir. Çöl quşlarından hazırlanan növbənöv xörəklər, şorabaya qoyulmuş əzgil, duza qoyulmuş armud və s. mənim sevdiyim nemətlərdir.
Zəngin təbiətli Masallının zəngin folklor nümunələri də var. Tədqiqatçılar tərəfindən lazımınca araşdırılmamış Masallıda son dərəcə unikal folklor nümunələri mövcüddur. Masallıda ana-bacılarımızın dəstə qurub oxuduqları halaylar bizim Yardımlı kəndlərində də var.
Masallı ziyalılar ocağıdır desəm qətiyyən yanılmaram. Ara-sıra burada keçirilən ziyalılarla görümlərdə, mədəni-kütləvi tədbirlərdə iştirak edirəm.
Sabir Rüstəmxanlı - Şair, yazıçı, Azərbaycan Milli Məclisinin deputatı.