Musiqili Teatrın saytı yenilənir
5 İyul 2014 21:00 (UTC+04:00)
Azərbaycan Dövlət Musiqili Teatrının saytında yenilənmə işlərinə
başlanılıb. Movqe.az xəbər verir ki ,Teatrın mətbuat xidmətindən
verilən məlumata görə, bir neçə ay öncə
www.statemusicaltheatre.az ünvanında istifadəyə verilən sayt, yeni
mövsümdən etibarən daha maraqlı və zəngin tərtibatda
teatrsevərlərin ixtiyarına veriləcək.
Teatrın direktoru, əməkdar incəsənət xadimi, fəlsəfə doktoru
Əliqismət Lalayev bizimlə söhbətdə bildirdi ki, əsas yeniliklər
saytın vizual və texniki sahəsini əhatə edəcək: "Məsələn, sayt
bütün mobil qurğulara adaptasiya olunacaq. Yəni, istənilən formatlı
ekranda rahat və tam şəkildə açılacaq. Android proqramının
sayəsində teatrın son yeniliklərilə tanışlıq imkanı qazanılacaq.
Tətbiq olunacaq Noviqasiya menyusu da sayt üzrə axtarış sistemini
asanlaşdıracaq. Bütün bunlar ölkə teatrları arasında ilk dəfə məhz
Musiqili Teatrın saytında öz əksini tapacaq. Bundan başqa,
pepertuar bölümü sadəcə həftəlik elanla məhdudlaşdırılmayacaq,
həmçinin gündəlik elektron anonslar da tamaşaçıların diqqətinə
çatdırılacaq.
Xatırladaq ki, iki ay öncə seyrçiləri Musiqili Teatra cəlb etmək,
onları teatr sənətinin gündəmində gedən yeniliklərlə daim
bilgiləndirmək məqsədilə toplu sms xidməti aktivləşdirilmişdi.
Teatr sahəsində gerçəkləşmiş bu ilk təşəbbüs də məhz Musiqili
Teatrın adına yazılıb. Repertuar sahəsində olacaq digər yenilik,
teatrın həm repertuarında gedən, həm də artıq tarix olmuş
tamaşaları, habelə müxtəlif audio və foto məlumatlar saytın
Multimediya bölməsində yer alacağıdır.
Həyatını teatra həsr edən əməkdaşlar da diqqətdən kənarda
qalmayacaq. Belə ki, teatrın istər yaradıcı, istərsə də texniki
heyətin doğum və digər əhəmiyyətli günləri avtomatik təbriklərlə
ürəkləri xoşhal edəcək".
Qeyd edək ki, Azərbaycan Dövlət Musiqili Teatrın internet saytının
təqdimat mərasiminin 105-ci mövsümün əvvəlində keçirilməsi
planlaşdırılır.