Ovik Abramyan Qazaxda (FOTO)
6 İyul 2014 20:00 (UTC+04:00)
Ermənistan baş naziri Ovik Abramyan bu gün Qazax rayonunun işğal
edilmiş bir neçə kəndindən keçərək Azərbaycan ərazisində anklav
kimi yerləşən Lələkənd (Vazaşen) kəndinə gəlib.
Movqe.az ANS PRESS-ə istinadən xəbər verir ki, Abramyanın məqsədi
Azərbaycan sərhədinə yaxın yerləşən Paravakar kəndindən Lələkəndə
çəkilən dolayı yolun çəkilməsinə nəzarət etmək olub. Ermənilərin
dediyinə görə, dolayı yol ona görə çəkilir ki, əsas yol Azərbaycan
hərbçilərinin atəşinə məruz qalır. Amma yol tikənlər Abramyana
bildiriblər ki, yeni yolu da çəkmək mümkün deyil, çünki Azərbaycan
hərbçiləri onu da atəş altında saxlamağa qadirdilər.
Ermənilər sovet rejiminin son illərində Moskvanın dəstəyindən
yararlanaraq Lələkənd anklavandan İcevana tərəf olan Azərbaycan
kəndlərini (Barxudarlı, Sofulu və s.) dağıtdılar. Həmin kəndlərin
əhalisi Qazaxın bir sıra kəndlərinə məcburi köçkün kimi yerləşdi.
Yəni həmin əraziləri nəzarəti götürmək, yaxud həmin ərazilərdə hər
hansı qanunsuz layihələrin gerçəkləşdirilməsinə mane olmaq məhz
Azərbaycan hərbçilərinin borcudur. Beynəlxalq hüquq bunu tələb
edir.
Amma Azərbaycan ərazilərini işğal etmiş bir dövlətin baş naziri
olan Ovik Abramyan utanmadan özü ilə jurnalistlər gətirərək,
şikayətlənir ki, baxın, Azərbaycan işğal elədiyimiz, dağıtdığımız
kəndlərində layihələr keçirməyə imkan vermir.