Gərginliklər Kiyevə də təsir edir
11 Oktyabr 2014 13:15 (UTC+04:00)
Ukraynanın şərq vilayətlərində hökumət qüvvələri ilə separatçılar
arasında yaşanan gərginliklər paytaxt Kiyevə də təsirsiz
ötüşmür.
Movqe.az Milli.az-a istinadən xəbər verir ki, ötən gün bir qrup
fəal prezident administrasiyasının binası qarşısında toplaşaraq
hökumətə qarşı etiraz aksiyası keçirib. Aksiya zamanı "Avtomaydan"
hərəkatının fəalları girov saxlanılanların buraxılmasını tələb
ediblər.
"Prezidentin bizi eşitməsini tələb edirik. Tələb edirik ki, Maydan
meydanında insanları öldürən cinayətkarlar tapılaraq
cəzalandırılsın. Ordunun silahla təmin olunması vədləri yerinə
yetirilməlidir", - etirazçıardan biri qeyd edib.
Fəalların prezident aparatına soxulma cəhdi polislə qarşıdurmalara
səbəb olub. Aksiyada, əsasən, girovların yaxınları iştirak edib.
Onlar "hamının əvəzində hamı" şüarı ilə Minskdə əldə olunan
razılaşma şərtlərinin icra olunmasını istəyiblər.
Özlərini Donetsk Xalq Respublikası elan edən qurum üzvləri bir
müddət əvvəl tərəflər arasında girovların mübadiləsini
dayandırmışdı.
İndiyə qədər 1340 girov azadlığa buraxılıb. Lakin separatçılar,
hələ ki, 600 girovu əsarət altında saxlayırlar. Separatçılar
tərəfdən isə azı 400 nəfərin girov düşdüyü bildirilir.
Ukrayna PrezidentiPyotr PoroşenkoDonetskdə yaşanan
atışmalar fonunda bölgəyə səfər edib. Səfəri zamanı dövlət başçısı
Kurakhove hərbi bazasına baş çəkib. Prezident ordunun baş
qərargahında separatçılara qarşı döyüşən bir neçə hərbçiyə mükafat
verib. Poroşenko, eyni zamanda Donetskdə bir qədər əvvəl
vəzifəsindən istefa verən merin əvəzinə yeni meri təyin edib.
Birləşmiş Millətlər Təşkilatının hesablamalarına görə, Donetskdə
atəşkəs elan olunduqdan sonra baş verən silahlı qarşıdurmalarda azı
331 nəfər ölüb.