Azərbaycan Standartlaşdırma, Metrologiya və Patent üzrə Dövlət Komitəsi yarımillik nəticələri açıqlayıb
19 İyul 2012 12:39 (UTC+04:00)
Azərbaycan Standartlaşdırma,
Metrologiya və Patent üzrə Dövlət Komitəsi (SMPDK) 2012-ci ilin I
yarısı ərzində görülmüş işlərlə bağlı hesabatını açıqlayıb.
Komitədən "APA-ECONOMICS"ə
verilən məlumata görə, hesabat dövrü ərzində nəqliyyat
vasitələrində sürücülərin və sərnişinlərin təhlükəsizliyinin təmin
edilməsi istiqamətində bir sıra işlər görülüb. Belə ki, BMT-nin
Avropa İqtisadi Komissiyasının qaydaları əsasında standart
layihələri hazırlanmış və sürücülərin və sərnişinlərin
təhlükəsizliyinin təmin edilməsi istiqamətində 80 standart dövlət
qeydiyyatına alınıb. Ümumilikdə 2012-ci ilin birinci yarımili üzrə
98 standart təsdiq edilib və dövlət qeydiyyatına alınıb.
Hesabat dövründə SMPDK tərəfindən 70 müəssisəyə, o cümlədən 29
yanacaqdoldurma məntəqəsinə, 5 maye qaz doldurma məntəqəsinə, 4
alkoqollu içki, 1 əlvan metal, 1 neft məhsullarının istehsalına, 30
tibbi fəaliyyət ilə məşğul olmağa lisenziya alınması üçün rəy
verilməsi ilə əlaqədar metroloji ekspertiza keçirilib və müvafiq
rəy hazırlanıb.
Bundan başqa, 107 ədəd yeni ölçmə vasitələrinin tipi təsdiq
edilərək Azərbaycan ölçmə vasitələrinin Dövlət reyestrinə daxil
edilib.
Cari ilin 6 ayı ərzində Komitəyə 85 ixtira, 22 sənaye nümunəsinə
dair iddia sənədi daxil olub. "Patent haqqında" qanunun 28-ci,
29-cu maddələrinə əsasən, iddia sənədləri üzrə ekspertiza aparılıb
və nəticədə 112 ədəd ilkin ekspertiza sorğusu, 100 ədəd ekspertiza
sorğusu qəbul olunub, ilkin ekspertizanın müsbət nəticəsi haqqında
44 ədəd bildiriş, iddia sənədi barəsində məlumatın dərci haqqında
45 qərar, patent verilməsi haqqında 5 qərar, 5 imtina bildirişi
verilib.
Hesabat dövründə əmtəə nişanlarının və coğrafi göstəricilərin
ekspertizası ilə bağlı AzPatent əmtəə nişanına dair 916 iddia
sənədi, Madrid sazişi və protokolu çərçivəsində beynəlxalq əmtəə
nişanlarına dair 1322 bildiriş daxil olub. Hesabat dövründə əmtəə
nişanlarına dair 428 ilkin ekspertiza bildirişi, 10 ədəd ekspertiza
sorğusu, əmtəə nişanının qeydiyyata alınması üçün iddia sənədinin
baxılmağa qəbul edilməsi haqqında 532 arayış, əmtəə nişanının
qeydiyyata alınması haqqında 468 qərar, 94 əmtəə nişanının
qeydiyyata alınmasından imtina qərarı və 66 əmtəə nişanının
qeydiyyata alınmasına dair ilkin imtina bildirişləri tərtib olaraq
iddiaçılara təqdim edilib.
Daxil olmuş iddia sənədlərinin ekspertizasının nəticələri əsasında
ilk yarımildə 508 ədəd əmtəə nişanına dair şəhadətnamə, 57 ədəd
ixtira, 10 ədəd sənaye nümunəsi, 6 ədəd faydalı modelə dair patent
qeydiyyata alınaraq sahiblərinə verilib.