“Biz heç bir diaspora təşkilatına göstəriş verə bilmərik”
7 Avqust 2012 17:47 (UTC+04:00)
"Biz heç bir diaspor təşkilatına
göstəriş verə, onların fəaliyyəti ilə bağlı qərar qəbul edə
bilmərik. Biz yalnız müəyyən tövsiyələr verə bilərik". Lent.az-ın
məlumatına görə, bunu avqustun 7-də Türkiyənin Bodrum şəhərində
"Xarici ölkələrdə yaşayan azərbaycanlıların cəmiyyətə
inteqrasiyası: mövcud vəziyyət və perspektiv gözləntilər"
mövzusunda keçirilən forumda Prezident Administrasiyası
İctimai-siyasi məsələlər şöbəsinin müdiri Əli Həsənov
bildirib.
PA-nın şöbə müdiri qeyd edib ki,
mürəkkəb qlobal siyasi və iqtisadi proseslərin cərəyan etdiyi
müasir dünyada Azərbaycanın milli maraqlarının qorunmasında diaspor
təşkilatlarının da üzərinə böyük vəzifələr düşür: "Azərbaycan
dövləti xaricdə yaşayan soydaşlarımızın mənafelərini həmişə nəzərə
alır. Bizim istədiyimiz dünya azərbaycanlılarının birliyinə nail
olmaq, diasporun daha güclü, daha mütəşəkkil qüvvəyə
çevrilməsidir".