Yunanıstanda hökumətə qarşı yeni aksiyalar
1 Mart 2015 14:21 (UTC+04:00)
Yunanıstanın paytaxtı Afinada yeni hökumətə qarşı etiraz aksiyası
başlayıb. Fevralın 26-da keçirilən aksiya radikal sol partiyası
olan "Siriza"nın hakimiyyəti dövründə ilk belə ciddi
qarşıdurmadır.
Movqe.az milli.az-a istinadən xəbər verir ki , aksiya iştirakçıları
hökumətlə kreditorlar arasında əldə olunan razılaşmaya öz
etirazlarını bildiriblər. Aksiyaya təxminən 450 nəfər sağçı
qatılıb.
Afina Universitetinin qarşısında toplaşan qrup, buradan parlament
binasının da yerləşdiyi "Sintaqma" meydanına doğru yürüş edib.
Yürüş vaxtı təhlükəsizlik tədbiri görən çevik qüvvət polisi ilə
onlara daş və "Molotov kokteyli" atan aksiyaçılar arasında insident
baş verib. Belə ki, çevik polis aksiyaçılara qarşı gözyaşardıcı
qazdan istifadə edib.
Daha sonra aksiyaçılar ətrafda olan ofislərin, bank şöbələrinin,
avtobus dayanacaqlarının və telefon köşklərinin şüşələrini
sındırıb, yolda olan avtomobillərə od vurublar.
İlkin məlumata görə, aksiyalar zamanı insan tələfatı və yaralanma
hadisəsi qeydə alınmayıb.
Aksiya iştirakçılarının əsas etirazlarından biri də baş nazir
Alexsis Tsipras hökuməti ilə Avropa Birliyi arasında əldə olunmuş
razılıqla bağlıdır. Belə ki, Avropa Birliyi Yunanıstana edilən
yardımların müddətini 4 ay da uzatdığını bəyan edib. Birliyə daxil
olan bütün dövlətlərin parlamentlərinin razılığından sonra Avropa
Birliyi Yunanıstana maliyyə yardımı göstərəcək. Lakin rəsmi Brüssel
bu yardımlara görə Yunanıstan hökumətini islahatlara çağırır.
Avropa Birliyi Yunanıstandan vergidən yayınmağa görə tədbirlərin
gücləndirilməsi, yanacaq və tütün qaçaqmalçılığına qarşı mübarizə
və vergilərin yığılması ilə bağlı sistemin təkmilləşdirilməsini
tələb edir. Yunanıstanın daxili işlər naziri Nikos Vuçis qeyd edib
ki, Avropa Birliyi ilə Yunanıstan arasında əldə edilən razılaşma,
hökumətin sərt vergi siyasəti tətbiq etməyinə gətirib
çıxarmayacaq.
Avropa Birliyi Yunanıstan ilə əldə olunmuş razılaşmadan çox
razıdır. Lakin rəsmi Brüssel tələblərin dərhal yerinə
yetirilməsinin vacib olduğunu bildirir. Avropa Birliyi ümid edir
ki, bu tədbirlər Yunanıstan dövlətinin borclarının azalması
istiqamətində mühüm addım olacaq. Avropa Komissiyasının sədr
müavini Valdis Dombrovskis qeyd edib ki, Yunanıstan hökuməti
üzərinə düşən öhdəlikləri yerinə yetirmək üçün ciddi addımlar
atmalıdır: "Rəsmi Afina tərəfindən görülən tədbirlər iqtisadi
sabitliyin yaradılmasına və ölkədən kapital axınının qarşısının
alınmasına kömək edəcək". Qeyd edək ki, Yunanıstan dövləti
borclarına görə təkcə fevral ayında təxminən 2 milyard dollar pul
ödəməlidir. Mart ayında isə rəsmi Afina Beynəlxalq Valyuta Fonduna
1,5 milyard dollar verməlidir.
Artıq Almaniya Bundestaqı Avropa Birliyinin Yunanıstanla bağlı
proqramına razılıq verib. Deputatların əksəriyyəti Yunanıstana yeni
yardımlar paketinin verilməsinin lehinə səs verib. Almaniya xarici
işlər naziri Volfranq Şoyble bildirib ki, rəsmi Berlin Avropa
Birliyinin vahid qalması üçün əlindən gələni edəcək: "Lakin yeni
layihəyə görə, Yunanıstana milyardlarla dollarlıq yardım
edilməyəcək. Həmçinin Yunanıstan dövlətinin kredit borclarını
qaytarmasında da heç bir dəyişiklik olmayacaq. Sadəcə olaraq, biz
Yunanıstana borclarını qaytarmaq üçün bir zaman ayıracağıq". Qeyd
edək ki, Almaniya Yunanıstana kömək edən əsas donor ölkədir.
Avropa Birliyi ilə Yunanıstan arasında əldə edilən razılaşma baş
nazir Tsiprasın partiyasında da narazılıq yaradıb. İfrat solçular
hökuməti seçki kampaniyası vədlərindən geri çəkilməkdə ittiham
edib. Baş nazir seçkilərdən əvvəl qənaət tədbirlərinə son qoymağı,
240 milyard avroluq borc paketini də bitirməyi vəd edirdi. Amma
hazırkı hökumətin seçkidən qabaq verdiyi vədlərə əməl edəcəyi
gözlənilmir.