Tikinti işlərinin aparılması ilə əlaqədar Bakı Metropoliteninin
müvəqqəti bağlanmış 5 stansiyası ("20 Yanvar", "Memar Əcəmi",
"Nəsimi", "Azadlıq prospekti" və "Dərnəgül" ) bu gün səhər açılıb
və sərnişinlərin hərəkəti təmin edilib. Bu barədə bazar ertəsi
Trend-ə Bakı Metropolitenindən məlumat verilib.
Məlumata görə, "Avtovağzal" stansıyasının və "Memar Əcəmi"
stansiyasının 2-ci çıxışının inşası ilə əlaqədar "20 Yanvar",
"Memar Əcəmi", "Nəsimi", "Azadlıq prospekti" və "Dərnəgül"
stansiyalarının fəaliyyəti ikinci dəfə də bir neçə günlüyə
dayandırılacaq. Bununla bağlı yaxın günlərdə elan veriləcək.
Qeyd edək ki, bu stansiyaların bağlanması Bakı Metropoliteninin
Bənövşəyi xəttinin inşası ilə əlaqədar idi. Azərbaycan
Respublikasının Prezidenti İlham Əliyevin 18 mart 2011-ci ildə
imzaladığı "Bakı Metropoliteni Xətlərinin Konseptual İnkişaf Sxemi"
və "Bakı Metropoliteninin 2011-2015-ci illərdə inkişafına dair
Dövlət Proqramı"na uyğun olaraq, Bənövşəyi xəttin "Avtovağzal" və
"Memar Əcəmi-2" stansiyaları 2013-cü ildə istismara verilməlidir.
Tikinti başlandığı vaxtdan burada ən müasir tunelqazma maşınları
tətbiq olunmağa başlayıb və bu da qazıntının sürətlə aparılması
təkan verib. Artıq "Avtovağzal" və "Memar Əcəmi-2" stansiyaları
arasındakı hər birinin uzunluğu 2000 metrə çatan iki tunelin inşası
başa çatdırılıb. Layihəçilərin təklifinə əsasən, tunellər "Memar
Əcəmi-2" stansiyasının altından keçməli idi.
Dünya praktikasında qəbul olunmuş təcrübəyə əsasən, belə hallarda
yeni inşa olunan tunellərin inşası kəsişmə sahəsindən keçərkən,
mövcud xəttin həmin sahəsinin fəaliyyəti dayandırılır. Bu, ilk
növbədə, sərnişinlərin təhlükəsizliyi, daha sonra inşaat işlərinin
risksiz yerinə yetirilməsi məqsədilə atılmış addımdır. Qeyd
edilənləri əsas götürərək, layihəçilər və tikintini aparan
təşkilatlar Yaşıl xəttin bu istiqamətində qatarların hərəkətinin
dayandırılmasını təklif etmişdilər.
Hazırda Yaşıl xəttin qeyd edilən hissəsindən Bənövşəyi xəttin sağ
tunelində qazma işi aparan "Robins" tunelqazma kompleksinin də
həmin sahədən keçməsi istiqamətində işlər aparılır. Bu tip
qurğularla inşaatın aparılmasına, təhlükəsizliyin təminatına və
texniki tələblərə uyğun olaraq, eyni istiqamətdə hərəkət edən iki
tunelqazma kompleksi arasında ən azı 80-100 metr məsafə fərqi
olmalıdır. Bu səbəbdən, hazırda sol tunelin qazma işlərinin
başlanması ilə bağlı işlər davam etdirilir.
Bənövşəyi xəttin tunellərinin "Memar Əcəmi-2" stansiyasından keçən
hissəsinin uzunluğu 40 metrə bərabərdir. 2012-ci il avqust ayının
9-da saat 22:00-da başlanılmış iş artıq yekunlaşıb və tunelqazma
kompleksi Ceyhun Səlimov küçəsində yerləşən "B-3" stansiyasına
doğru üz tutub. Həmin tunelin uzunluğu 1300 metrdir.