"Azərbaycan zabiti Ramil Səfərovun Prezident İlham Əliyevin şəxsi təşəbbüsü və səyi nəticəsində Vətənə gətirilərək əfv edilməsi xalqımız tərəfindən böyük hadisə kimi qarşılandı. Düşmən ölkədə isə, əvvəlcədən məlum olduğu kimi, bu hadisə etirazlara və isterikaya səbəb oldu". Bunu Azərbaycan Müdafiə Nazirliyinin mətbuat xidmətinin rəisi polkovnik Eldar Sabiroğlu deyib.
"Ermənistan hakimiyyətinin uğursuz siyasəti kimi dəyərləndirilən bu məsələnin Sarkisyan rejimi üçün ciddi problemlər yaratdığını sübuta yetirməyə artıq ehtiyac yoxdur. Əhalinin qəzəbini sakitləşdirməyə çalışan Ermənistan rəhbəri müxtəlif üsullara və siyasi xilasa hesablanmış sərt bəyanatlara əl atsa da, istədiyi nəticəni reallaşdıra bilmir. Odur ki, ənənəsinə sadiq olan Sarkisyan Ramil Səfərovu terror vasitəsilə aradan götürmək yolunu seçib və dolaşan xəbərlərə görə aidiyyatı qurumlara öz göstərişlərini də verib", - Sabiroğlu deyib.
Azərbaycanın Müdafiə Nazirliyi bildirir ki, terrorizmdə xüsusi təcrübəyə yiyələnən Ermənistan prezidentinin bu alçaq niyyətinin qarşısını almaq və öz zabitinin həyatını qorumaq üçün Azərbaycan kifayət qədər imkanlara və önləyici tədbirlərə malikdir.
"Azərbaycana hədə-qorxuların əhəmiyyəti yoxdur və bizimlə bu dildə danışmağın vaxtı çoxdan keçib. Yaxşı olar ki, Ermənistan yeni siyasi və hüquqi vəziyyətin işə düşdüyünü anlamış olsun. Əks təqdirdə regionda yarana biləcək vəziyyəti indidən təsəvvürə gətirə bilərlər", - o əlavə edib.
Sabiroğlu qeyd edib ki, Macarıstan və Azərbaycan əməkdaşlığı sayəsində Vətənə qaytarılan Ramil Səfərov hadisəsindən bəzi kənar qüvvələrin narahatlıq keçirməsini də diqqətdən kənarda saxlamaq olmaz.
"Buradaca xatırlatmaq yerinə düşər ki, həmin qüvvələrin və havadarların yaxından köməyi ilə Azərbaycanın 20 faiz torpağını işğal edərək yurd yerlərimizi viran qoyan, minlərlə soydaşımızı vəhşicəsinə öldürən, 1 milyona yaxın günahsız insanı öz ocağından didərgin salan Ermənistanın başına, görəsən, nədən belə sığal çəkilir? Bunun səbəbini və ya hansı beynəlxalq hüquq çərçivəsinə sığdığını izah edə bilərlərmi? Bəli, olduqca ağır faciələr və cinayətlər zaman-zaman ermənilərin əli ilə azərbaycanlıların üzərində sınaqdan çıxarılsa da, lakin qəsbkara lazımi qiymət verilməsinin şahidi olmamışıq. Bizə gələndə isə həmişə susublar, sonra da ədalətdən, insan haqq və hüquqlarından danışıblar. Məgər dünyanın bu işgəncələrdən xəbəri yoxdurmu?" - o deyib.
Mətbuat xidmətinin rəisi bildirib ki, təkcə Xocalı faciəsinə - orada başı kəsilən körpələrin, hamilə qadınların, yaşlı insanların qətliamına görə Ermənistanın Sarkisyan və Köçəryan rejimi beynəlxalq məhkəmə qarşısında dayanmalı idi. "Serj Sarkisyanın özünün isə Xocalı qətliamındakı birbaşa rolu danılmaz faktdır. Vaxtilə hətta bundan qürurlanaraq həyasızcasına mətbuata açıqlama da vermişdi. Ədalətdən, insanlıqdan, vicdandan, bəşəri dəyərlərdən danışmağa onun haqqı olmamalıdır. Lakin ikili standartlar o qədər dərin kök salıb ki, Serj Sarkisyan kimi cinayətkarların törətdikləri soyqırımları, sadəcə, etiraf etməyə lüzum görmürlər. Bəla da bax bundan ibarətdir.
"Ramil Səfərovla bağlı Ermənistanın qopardığı məlum hay-küyə gəldikdə isə, Müdafiə Nazirliyi bildirir ki, artıq bunun heç bir əhəmiyyəti yoxdur. Zabitimizin Vətənə qaytarılması ədalətin, haqqın və Azərbaycan diplomatiyasının təntənəsi kimi qiymətləndirilməlidir", - Sabiroğlu bildirib.