"Şübhə yoxdur ki, bir gün Dağlıq Qarabağın azərbaycanlı və erməni icmaları Azərbaycanın bu bölgəsində sülh şəraitində, çiyin-çiyinə yaşayacaqlar.
Biz səmimi olaraq hesab edirik ki, sülh, sabitlik və qarşılıqlı faydalı regional əməkdaşlığın alternativi yoxdur. Azərbaycan münaqişənin tezliklə sülh yolu ilə həllində ən çox maraqlı olan tərəfdir". APA-nın xəbərinə görə, bu sözləri Azərbaycanın xarici işlər naziri Elmar Məmmədyarov sentyabrın 28-də BMT Baş Assambleyasının sessiyasındakı çıxışında deyib.
E. Məmmədyarov bildirib ki, Azərbaycan Dağlıq Qarabağın azərbaycanlı və erməni icmaları arasında görüşlər keçirilməsinə dair Avropadakı müxtəlif qeyri-hökumət təşkilatları tərəfindən irəli sürülən təşəbbüsləri münaqişənin həli baxımından çox vacib sayır: "Ermənistan nəhayət, dərk etməlidir ki, onun qonşu ölkələrə qarşı ərazi iddiası və düşmənçiliyə əsaslanan provokativ siyasəti uğur qazana bilməz. Ermənistan bunu nə qədər tez anlayarsa, ölkələrimiz o qədər tez qarşılıqlı anlayış əldə edər və bölgədə, sülh, sabitlik, əməkdaşlıq bərqərar olar".
Nazir çıxışında Suriyadakı böhran, islama qarşı həqarətlər və Yaxın Şərq probleminə Azərbaycanın münasibətini də açıqlayıb.