Bakıda bal sərgi-yarmarkası keçiriləcək
2 Oktyabr 2012 16:09 (UTC+04:00)
Movqe.az xəbər verir ki, Kənd Təsərrüfatı
Nazirliyi oktyabrın 17-dən noyabrın 5-dək Bakı şəhəri, Nərimanov
rayonunun ərazisində, "Gənclik" və keçmiş "Şuşa" kino-teatrının
yaxınlığında, Atatürk prospekti 6a və Maqsud Əlizadə 133
küçələrinin kəsişdikləri yerdə yerləşən "Laləndə" şadlıq sarayında
arıçılıq məhsullarının respublika sərgi-satış yarmarkası
keçirəcək.
Kənd Təsərrüfatı Nazirliyinin rəsmi saytına yer
alan məlumata görə, sərgi-satış yarmarkasının açılışı oktyabrın
17-də saat 12-də olacaq. Arıçılıq məhsullarının respublika
sərgi-satış yarmarkasının iştirakçılarının namizədlikləri verilən
bölgülərə əsasən şəhər və rayon icra hakimiyyətləri tərəfindən
müəyyənləşdiriləcək və Kənd Təsərrüfatı Nazirliyi tərəfindən dəvət
olunacaqlar. Arıçılıq məhsullarının sərgi-satış yarmarkasında 49
rayondan 200 nəfər arıçı iştirak edəcək. Satışa 300 ton bal, 40 kq
vərəmum, 1 kq arı südü, 25 kq çiçək tozu çıxarılacaq. Arıçılıq
məhsullarının sərgi-satış yarmarkası başlamamışdan əvvəl oktyabrın
1-dən 17-dək satışa çıxarılan arıçılıq məhsullarının keyfiyyəti
respublika baytarlıq laboratoriyasında yoxlanılacaq. Keyfiyyətsiz
məhsullar satışa buraxılmayacaqdır. Alimlərin, mütəxəssislərin,
arıçıların və arıçılar cəmiyyətlərinin təklifləri nəzərə alınaraq,
1 kq yüksək keyfiyyətli bal 15 manata satılacaq.
Yarmarkada gənc arıçılara minimum bilgilər
veriləcəkdir, elmi-praktiki konfrans keçiriləcək, xəstəliklərə
qarşı mübarizə tədbirlərindən söhbət açılacaq, damazlıq-seleksiya
işləri barədə təcrübə mübadiləsi aparılacaq. Kənd Təsərrüfatı
Nazirliyi Bakılıları və Sumqayıtlıları Arıçılıq məhsullarının
respublika sərgi-satış yarmarkasına dəvət edir.