İşğal olunmuş ərazilərində abidələrin dağıdılması ilə bağlı hesabat hazırlanır
5 Oktyabr 2012 14:24 (UTC+04:00)
"Azərbaycan xalqı müxtəlif
dini konfessiyaların, o cümlədən ermənilərin dini abidələrinə
tolerantlıq dəyərləri əsasında yanaşır".
APA-nın məlumatına görə, bu barədə
Dini Qurumlarla İş üzrə Dövlət Komitəsinin sədri Elşad İskəndərov
Bakıdakı erməni kilsəsinin qorunması məsələsinə münasibət
bildirərkən deyib.
E. İskəndərov bildirib ki, Ermənistanda bundan fərqli olaraq,
Azərbaycan xalqına məxsus tarixi və islam abidələri dağıdılır:
"Dövlət Komitəsi Ermənistanda və Azərbaycanın işğal olunmuş
ərazilərində islam abidələrinin dağıdılması ilə bağlı hesabat
hazırlayır, hesabat yaxın vaxtlarda beynəlxalq ictimaiyyətə təqdim
ediləcək".
O, Qarabağın erməni torpaqları olduğu barədə iddialarının
əsassızlığını sübut edən bir məqama da toxunub: "Eçmiədzin
kilsəsinin ilk sənədlərində Dağlıq Qarabağda şöbəsinin olduğu
əksini tapmayıb. Yalnız 19-cu əsrin ortalarında Qarabağdakı alban
kilsəsi xüsusi göstərişlə ermənilərin ixtiyarına verilib. Ermənilər
alban kilsələrindəki arxivi vəhşicəsinə məhv ediblər. Ancaq tarixi
silək olmaz. Bir müddət əvvəl Misirdə alban kilsələri ilə bağlı
yazılı sənəd tapılıb. Biz bu faktları da beynəlxalq ictimaiyyətə
təqdim edəcəyik".