“Məhkumlar” serialının təqdimat mərasimi keçirilib
5 Oktyabr 2012 18:57 (UTC+04:00)
4 oktyabr 2012-ci il tarixində saat 18:00 - da "Qafqaz Point
Otel"də ATV telekanalının sifarişi ilə çəkilən "Məhkumlar"
serialının təqdimat mərasimi keçirilib. Tədbiri giriş sözü ilə açan
"Məhkumlar" televiziya serialının quruluşçu rejissoru və "Oscar
film production"un baş direktoru Yaşar Əhmədov serial haqqında qısa
məlumat verərək bildirib ki, serialın yaradıcı kollektivi serialda
cəmiyyətdə baş verən əksər sosial problemlərin ekran həllini
tapmağa çalışıblar.
Ailədaxili zorakılıq, erkən və yaxın qohum nikahları, valideyn –
övlad münasibətləri kimi ciddi sosial mövzuların əks olunduğu
serialla bağlı çıxış edən ziyalılar, ictmaiyyət nümayəndələri
serialda əks olunan problemlərin ekranda öz bədii həllini uğurla
tapacağına inandıqlarını qeyd ediblər. Qeyd olunub ki, geniş
izləyici auditoriyasına xidmət edən teleserialın ilkləri sözün əsl
mənasında saymaqla bitmir. Belə ki, Azərbaycanda ilk dəfə
"Məhkumlar" teleserialının internet portalı (www.mahkumlar.az )
fəaliyyətə başlayıb. Bundan başqa teleserialın tanıtım filmi ayrıca
filmin bölümlərindən olan fraqmanlardan istifadə edilmədən
hazırlanıb. Ayrıca, teleserialın əsas qəhrəmanı Adil obrazının
ifaçısı İlkin İbayev xüsusi olaraq Avstriyadan ölkəmizə dəvət
olunub. Daha sonra tədbir iştirakçıları serial sənayesinin inkişafı
üçün belə serialların daha çox çəkilməli olduğunu vurğulayaraq
serialın yaradıcı kollektivinə uğurlar arzulayıblar.
Tədbir serialın izləyicilərinə serial tariximizdə bir ilk olaraq
ATV telekanalının efirindən canlı olaraq təqdim olunması ilə başa
çatıb.