“Bakı dünən, bu gün və sabah” - sərgi-müsabiqəsini elan edilib
10 Oktyabr 2012 16:21 (UTC+04:00)
Heydər Əliyevin anadan olmasının
90, Azərbaycan Xalq Cümhuriyyətinin yaranmasının 95 illik
yubileyinə həsr olunan "Bakı dünən, bu gün və sabah" adlı
rəssamların respublika sərgi-müsabiqəsini elan edilib. Mədəniyyət
və Turizm Nazirliyinin mətbuat xidmətindən APA-ya verilən məlumata görə, sərgi
oktyabrın 9-dan 2013-cü ilin aprelin 15-dək davam edəcək. Müsabiqə
Mədəniyyət və Turizm Nazirliyi, Rəssamlar İttifaqı, Bakı Şəhər
Mədəniyyət və Turizm İdarəsi, Azərbaycan Dövlət Rəsm Qalereyası və
"Xətai" Sənət Mərkəzi ilə birlikdə təşkil edilib.
Müsabiqəyə təqdim edilən əsərləri tanınmış rəssamlar və ixtisaslı
mütəxəssislərdən ibarət 9 nəfərdən ibarət münsiflər heyəti
yoxlayacaq. Müsabiqənin qalibləri müxtəlif nominasiyalar üzrə pul
mükafatları ilə təltif ediləcəklər.
Sərgi-müsabiqədə iştirak etmək istəyən rəssamlar öz əsərlərini
2013-cü il mart ayının 15-dən 2013-cü il aprel ayının 15-dək Dövlət
Rəsm Qalereyasına təqdim edə bilərlər.
Müsabiqənin məqsədi Bakı şəhərinin tarixi keçmişini, bu günü və
gələcək inkişaf perspektivlərini əks etdirən, yüksək sənət
tələblərinə uyğun yeni incəsənət əsərlərinin yaradılmasından
ibarətdir. Eyni zamanda müəyyən olunan 12 mövzu üzrə rəngkarlıq,
qrafika və heykəltəraşlıq müsabiqəsi və sərginin təşkilini özündə
əks etdirir.