AEROPORTA YENİ YOL ÇƏKİLİR
19 Oktyabr 2012 14:15 (UTC+04:00)
Bakı şəhərinin mərkəzindən - Heydər Əliyev
prospektinə paralel olaraq Qələbə Meydanından birbaşa Böyükşor yol
qovşağı ilə birləşən yeni avtomobil yolu tikiləcək.
Layihənin icraçısı olan "Akkord"
şirkətindən "APA-ECONOMICS"ə verilən məlumata görə, yol
başlanğıcını Həsən Əliyev küçəsi ilə Koroğlu Rəhimov küçəsinin
kəsişməsindən götürəcək, Böyükşor yol qovşağınadək uzanacaq. Yeni
yolun uzunluğu 7,3 km, hərəkət zolaqlarının sayı 6-dır (3+3). Yol
boyunca ümumi uzunluğu 3 000 metr olan 4 körpü, eləcə də ümumi
uzunluğu 1 200 metr olan 5 tunelin inşası nəzərdə tutulub.
Şirkətdən verilən məlumata görə, yeni yol Həsən Əliyev küçəsindən
başlayaraq Keşlə qəsəbəsi və "Ulduz" metro stansiyasının
yaxınlığından keçməklə "Koroğlu" metro stansiyasının yanındakı yol
qovşağına birləşəcək və aeroporta istiqamətlənəcək. Belə ki, yol
Həsən Əliyev küçəsindən Aşıq Molla Cümə küçəsi, Əhməd Rəcəbli
küçəsi, Əliyar Əliyev küçəsi, dəmir yolları, "Depo", metro yolu və
Ələsgər Qayıbov küçəsi üzərindən davam edərək Volodarski küçəsinə
qovuşacaq və həmin küçə ilə davam edəcək. Bundan sonra yol Müzəffər
Nərimanov küçələri ilə kəsişərək Gön Dəri Zavodu qarşısında Ziya
Bünyadov prospektinə birləşəcək.
Gələcəkdə yeni yolun Ziya Büyadov prospekti altından 6 zolaqlı alt
keçid tipli yolötürücüsü ilə davam edərək, Heydər Əliyev Beynəlxalq
Hava Limanı istiqamətində Heydər Əliyev prospektinə üst keçid tipli
yolötürücü vasitəsi ilə birləşdirilməsi planlaşdırılır. Bu qovşağın
ümumi uzunluğu 2 205 metr təşkil edir. Gələcəkdə tikintisi nəzərdə
tutulan bu qovşaqda inşası planlaşdırılan yeni Olimpiya Kompleksinə
giriş-çıxış yollarının təmin olunması da nəzərdə tutulub.
Yeni yolun Aşıq Molla Cümə küçəsi ilə kəsişməsində yeni piyada
keçidinin tikintisi nəzərdə tutulub. Piyada keçidinin tikintisi
Azərbaycan Dövlət İqtisad Universitetinin buradakı binasının
qovşağa yaxın ərazidə olması, tələbələrin və vətəndaşların
təhlükəsiz keçidini təmin etmək məqsədi daşıyır.
Digər piyada keçidləri yolun Əhməd Rəcəbli küçəsi ilə kəsişməsində,
"Ulduz" metro stansiyasına yaxın ərazidə, Volodarski və Müzəffər
Nərimanov küçələri ilə kəsişmədə, eləcə də Gön Dəri Zavodunun
qarşısında tikiləcək.
Yolun keçəcəyi ərazilərdə bəzi obyektlərin söküntüsü
planlaşdırılır. "Gələcəkdə tikintisi nəzərdə tutulan bu qovşaqda
inşası planlaşdırılan yeni Olimpiya Kompleksinə giriş-çıxış
yollarının təmin olunması da nəzərdə tutulur", - deyə "Akkord"dan
bildirilib.