Bu gün Milli Məclisə V çağırış
seçkilər keçirilir. Movqe.az-ın əməkdaşı 10 saylı
Binəqədi üçüncü Seçki Dairəsisinin bir neçə məntəqəsində olaraq
seçki prosesinin gedişini izləyib. Yolumuzu 3 saylı seçki
məntəqəsindən salırıq. Biz ərazidə olduqda saat əqrəbləri 9:20-nin
üzərində idi. Bu məntəqədə digərlərindən fərqli olaraq izləyici
kamera olduğundan,məntəqə sədri Pərviz Mirzəyev bildirdi ki,
səsvermə prosesi nəzarət altındadır.
P. Mirzəyev 3 saylı məntəqədə 1425 seçicinin qeydiyyatda olduğunu, saat 9:20-ə olan məlumata görə, 80 seçicinin səsvermə prosesində iştirak etdiyini söyləyib. P. Mirzəyevin sözlərinə görə, səsvermə prosesini həm yerli, həm də beynəlxalq müşahidəçilər izləyir: "Səsvermə prosesi çox aktiv keçir. 08:30-a olan məlumata görə, artıq 100-dən çox seçici səs verib. Kamera tərəfindən proses izlənilir. Səsvermə yüksək səviyyədə davam edir".
Məntəqədə bitərəf müşahidəçi olan
Orxa n İsayev hələki heç bir qanun pozuntusuna rast gəlmədiyini
deyib. O. İsayev bildirib ki, səsvermə demokratik şəraitdə
seçicilərin aktivliyi ilə müşahidə olunur. Yeni Azərbaycan
Partiyasının bu məntəqə üzrə təmsilçi müşahidəçisi olan Tural
Əliyev də səsvermə prosesinin normal keçdiyini, qanunvericiliyin
tələbinə zidd bir hadisənin qeydə alınmadığını bildirib: "Mən səhər
tezdən, səsvermə prosesi başlayandan müşahidə aparıram. İndiyədək
heç bir qanun pozuntusu qeydə almamışam".
Ana Vətən Partiyasının bu məntəqə üzrə təmsilçisi Rövşən Abdullayev də səsvermə prosesində qanunazidd heç bir hal qeydə almadığını söylədi: "Müşahidəçilər maneəsiz şəkildə seçkini izləyir. Mən də bayaqdan müşahidə aparırıam. Hələki bir nəfər belə qanunsuz səsverməyə cəhd etməyib".
Bu məntəqədə bu gün ən gənc seçici də səs verdi. 1997-ci il təvəllüdlü Vyaldin Elvin ilk dəfə səs vermək hissinin qürurverici olduğunu söyləyib: "İlk dəfə səs verirəm. Təbii ki, indiyədək bu hissi keçirmədiyimdən, səs vermək, vətəndaş olaraq bu prosesə qatılmağın mahiyyətini dərk etmirdim. Düşünürəm ki, gənclik düzgün seçim edir. Mən də seçimimdə yanılmamışam. Öz səsimi mənim Milli Məclisdə səsim ola biləcək birinə etibar edirəm. Ona görə də arxayınam və əminəm ki, seçimimdə yanılmamışam. Bu mənim seçkidə ilk iştirakımdır. Bundan sonra, gələcək seçkilərdə də vətəndaş olaraq aktiv olacağam".
"Səs verəcəyin namizədi hansı meyarlara əsasən müəyyənləşdirdin" sualımıza Elvin konkret cavab verdi: "Onun əməllərinə. Mən vədə yox, əmələ inanıram. Verdiyi sözləri əməldə gördüyüm namizədi seçdim və bu gün ona səs verəcəyəm".
