Sabiq baş nazir və keçmiş Milli Qəhrəman Surət Hüseynov parlamentin spikeri Oqtay Əsədova məktubla müraciət edib.
Məktubda sabiq komandan və keçmiş məhkum vaxtilə layiq
görüldüyü, sonradan məhrum edildiyi Milli Qəhrəman fəxri adının
bərpa olunmasını xahiş edib.
S.Hüseynov məktubunda dəfələrlə spikerə yazılı, internet vasitəsilə
müraciət etməsinə baxmayaraq, ondan nə mənfi, nə də müsbət cavab
ala bildiyini qeyd edib.
Buna görə də spikerə açıq məktub vasitəsilə müraciət etməyə məcbur
olduğunu yazan S.Hüseynov onu da iddia edib ki, onun şikayətinə,
müraciətlərinə baxılmaması Azərbaycan Respublikasının
Konstitusiyasının və qanunlarının pozulması deməkdir:
"Bir daha diqqətinizə çatdırıram ki, Azərbaycanın Milli Qəhrəmanı
adı mənə Azərbaycan Respublikasının suverenliyi və ərazi
bütövlüyünün qorunmasında, dinc əhalinin təhlükəsizliyinin təmin
edilməsində göstərdiyim şəxsi igidlik və şücaətə görə verilmişdir.
Bu adın qaytarılması uğrunda mübarizənin aparılması mənim hüququm
və haqqımdır".
Qeyd edək ki, məktub oktyabrın 17-də imzalanıb və ünvanlarına
Qurban bayramı günlərində yetişib.
Keçmiş baş nazirin Milli Qəhrəman statusunun ona yenidən
qaytarılması ilə bağlı qaldırdığı iddia digər sabiq baş nazir Pənah
Hüseyn tərəfindən narazılıqla qarşılanıb.
P.Hüseyn bununla bağlı mətbuata açıqlamasında S.Hüseynovu hələ
hakimiyyətdə olduqları dövrdən-1992-93-cü illərdən Milli Qəhrəman
kimi qəbul etmədiyini bildirərək, onun qaldırdığı iddianın
əhəmiyyətsiz olduğunu da vurğulayıb:
"Sürət Hüseynova Milli Qəhrəman statusunun verilməsinin mən
əvvəldən əleyhinə olmuşam. Bu barədə mənim münasibətim
bəllidir.
Heç vaxt onu Milli Qəhrəman hesab etməmişəm və indi də hesab
etmirəm. Lakin o belə bir məsələ qaldırıbsa, bu onun öz işidir və
mən bunu əhəmiyyətli bir şey də saymıram".
Onu da qeyd edək ki, mərhum Prezident Əbülfəz Elçibəy S.Hüseynova
Milli Qəhrəman adını 1992-ci ildə təltif edib.
Eyni zamanda xatırladaq ki, S.Hüseynov isə 1993-cü il 4 iyun
qiyamının - Ə.Elçibəy hakimiyyətinin silah yolu ilə devrilməsinin
əsas rəhbəri olub.