Şəhəri zibilləyənlər
7 Noyabr 2012 15:48 (UTC+04:00)
Paytaxt Bakı gün-gündən inkişaf etməkdədir. Şəhərimiz müxtəlif
beynəlxalq tədbirlərə ev sahibliyi edir. Gələn qonaqları
gözəlliyinə heyran qoyur. Belə yüksək sürətli inkişaf ilə yanaşı
hələ də həllini tapmayan köhnə problemlər də var. Bu problemlər
sırasında küçələrin zibillənməsi məsələsi xüsusi ilə seçilir. Belə
halların qarşısını almaq üçün qanunverilikdə hansı dəyişiklik
edilməsi və maarifləndirmə işləri aparılması xüsusi maraq
doğurur.
Sosioloq Rafiq Təmrazov məsələ ilə əlaqədar Movqe.az saytına
bildirir: "Elə məsələlər var ki, onlar təkcə qanunvericiliklə həll
olunmur. Söhbət ondan gedir ki, insanların ictimai şüur səviyyəsi
də dəyişməlidir. Mədəni səviyyə yüksək olmalıdır. Təbii ki,
qanunvericilik səviyyəsində inzibati tədbirlər həyata keçirilə
bilər. Hansısa cərimələrdən, cəza növlərindən istifadə etmək olar.
Şərq ölkələri sırasında Seneqal, Sinqapur kimi ölkələrdə başqa
metodlar tətbiq edilir. Şəhəri zibilliyən insanları ictimai qınaq
kimi küçədə gəzdirirlər, adamlara göstərirlər. Lakin Avropa
ölkələrində cərimələr tətbiq edirlər. Burda söhbət ondan gedir ki,
Avropa ölkələrində insanların ictimai şüur səviyyəsi, mədəni
səviyyəsi o qədər yüksəkdir ki, onlar küçələri zibilləməyə meyl
göstərmirlər. İndiki zamanda konkret nələrsə demək bir az çətindir.
Amma ümumi şəkildə hansısa inzibati qaydalar, cərimələr tətbiq
etmək yolu ilə bunun qarşısını almaq olar. O metodları tətbiq etmək
lazımdır ki, onları praktiki olaraq həyata keçirtmək mümkün olsun.
Əgər bu qərar elə qərar kimi qalacaqsa onda əhəmiyyəti
olmayacaqdır. Belə halların qarşısınıı almaq üçün, müəyyən
seminarların , tədbirlərin həyata keçirilməsi o qədər də effektiv
olmaz. Müəyyən qrup əhali ilə kütləvi tədbirlərin keçirilməsi daha
məqsədə uyğundur. Bizdə insanların bəziləri avtomobillərdən zibili
kənara tullayırlar. İnsanlarımız qəbul etdikləri qida məhsullarının
qalıqlarını, kontur, siqarət və s. tullantıları atmaqla şəhəri
zibilləyirlər. Ona görə də cəmiyyətdə seçilən insanların, məsələn
tanınmış aparıcılar, aktyorlar, deputatların iştirakı ilə kütləvi
tədbirlərin həyata keçirilməsi sayəsində ictimai şüura təsir etmək
olar. Bu tədbirlərin, kampaniyaların həyata keçirilməsi mütəmadi
xarakter daşımalıdır ki müsbət nəticələr əldə edilsin."