Bahar Muradova müxalifətə uğur arzuladı
12 Noyabr 2012 17:48 (UTC+04:00)
"Hakim partiya tərəfindən seçkilərarası fəaliyyət dövrü məhz
növbəti seçkilərə hazırlıq dövrü kimi qəbul olunur".
Lent.az-ın verdiyi məlumata görə, bunu Milli Məclis sədrinin
müavini, Yeni Azərbaycan Partiyasının (YAP) icra katibinin müavini
Bahar Muradova hakim partiyanın qarşıdan gələn 2013-cü ilin
prezident seçkilərinə hazırlığa qeyri-rəsmi olsa belə, start
verib-verməməsi məsələsinə münasibətini bildirərkən söyləyib.
Bahar Muradova deyib ki, Yeni Azərbaycan Partiyasının bütün
strukturları, seçkili orqanlarda təmsil olunan nümayəndələri, o
cümlədən partiyanın rəhbəri, ölkə prezidenti fəaliyyətini o
səviyyədə qurur ki, onun hər günü, hər anı, hər dəqiqəsi növbəti
seçkilərə hazırlıq xarakteri daşıyır. Vitse-spikerin sözlərinə
görə, bu məsələ onların üzərlərinə götürdükləri öhdəliklərin yerinə
yetirilməsi anlamını da özündə ehtiva edir: "Bizdə hansısa
qeyri-adi keçid, qeyri-adi hazırlığa start praktikası olmayıb.
Bunlar çox rahat, biri digərini əvəz edən vəzifələr kimi qarşımızda
dayanır. Yəni xüsusi belə bir rejimə keçid yoxdur, çünki istənilən
anda bizim bütün qurumlarımız bütün vəzifələri yerinə yetirməyə
hazırdırlar. Bu baxımdan seçki bitəndən sonrakı dövr bizdə növbəti
seçkiyə hazırlıq dövrü kimi qəbul olunur".
Bahar Muradova eyni zamanda, son zamanlar 2013-cü il seçkiləri ilə
bağlı hakim partiya və iqtidar daxilində fikir ayrılıqlarının,
təlatümlərin olması haqda müxalifət düşərgəsində, həmin qüvvələrə
yaxın olan müxalif mediada səsləndirilən iddialara da toxunub: "O
iddiaların heç bir reallığı və həqiqəti əks etdirmir. Hakim komanda
2013-cü il seçkilərinə də monolit bir qüvvə şəklində gedir və
gedəcək".
YAP icraçı katibinin müavini müxalifətə də mesaj göndərib: "Bizim
də istədiyimiz odur ki, Azərbaycanda elə bir mühit mövcud olsun ki,
hətta, 3-5 adam tərəfindən dəstəklənməyən adam belə özünü ehtimali
şəkildə prezidentlikdə görsün. Yəni, bunun üçün hansısa bir
məhdudiyyət hiss etməsin. Bu, çox yaxşıdır ki, hətta, cüzi imkanı
olmayan adamlar belə özlərini bu vəzifəni yerinə yetirməyə hazır
bilirlər və bu cəhddə bulunurlar. Bulunsunlar, yeganə hakimiyyət
xalqadır və xalq da bu məsələdə mövqeyini bildirəcək ki, kim
Azərbaycanı irəliyə aparmaq imkanlarına malikdir, kimə etimad
göstərmək lazımdır, kim bu vəzifələri yerinə yetirə bilər. Bunu isə
xalq dəfələrlə bildirib, deyib və mən inanıram ki, qarşıdakı
seçkidə də deyəcək, bildirəcək. Müxalifət düşərgəsinə isə öz
fəaliyyətlərində, öz işlərində uğurlar arzulayıram..."