Son dövrlər Azərbaycana gətirilən tikinti materiallarının qiymətində müəyyən qədər bahalaşmanın olduğu müşahidə edilir. Belə ki, Rusiyadan gətirilən tikinti materialları növündən asılı olaraq ümumən 5-10 faizə qədər bahalaşıb.
Məlum olduğu kimi isə hazırda çoxmərtəbəli binaların tikilməsi az sayda baş verir. Evlərin inşaası prosesi özünü daha çox fərdi ev tikintisində göstərir. Digər tərəfdən, tikinti materialları əsasən idxal olunduğundan istər-istəməz baş verən bahalaşma tikilən binaların da qiymətinin müəyyən qədər yüksəlməsilə nəticələnə bilər.
Ümumiyyətlə, sözügedən bahalaşma tendensiyasının mənzil, xüsusən də fərdi evlərin tikintisinə nə vəd edə biləcəyini ekspertlərdən öyrəndik. Əmlak Bazarı İştirakçıları İctimai Birliyinin sədri Ramil Osmanov düşünür ki, idxal tikinti materiallarının qiymətinin bahalaşmasının ölkəmizdəki fərdi yaşayış evlərinin tikintisinə hər hansı bir ciddi təsiri yoxdur: "Hazırkı situasiyada idxal materiallarında bahalaşma daha çox ikimərtəbəli binaların tikintisinə, fərdi yaşayış evlərilə müqayisədə daha çox təsir göstərir. Bu da onunla bağlıdır ki, fərdi yaşayış evlərində idxal olunan tikinti materialarının payı bir o qədər də çox deyil. Binanın özülünə işlənən daş, sement və beton bütünlüklə yerli istehsal hesabına təmin olunur. Yalnız dam örtüyündə istifadə olunan taxta materialı xaricdən gətirilir və burada mütəmadi olaraq qiymət dəyişmələri baş verir. Amma dam örtüyünün alıqdığı ölkələrin sayı çox olduğundan birində qiymət artımının baş verməsi digərindən gətirilən anoloji materialda da bahalaşmanın olacağı anlamına gəlmir. Yəni bu baxımdan bütün dam örtüyü məhsullarının qiymətinin bahalaşacağı ehtimalı aşağı səviyyədədir. Bu baxımdan hesab edirəm ki, xaricdən gətirilən tikinti materiallarının qiymətinin qalxmasının fərdi yaşayış evlərinə elə də ciddi təsiri yoxdur".
İqtisadi və Sosial İnkişaf Mərkəzinin sədri Vüqar Bayramov isə qeyd etdi ki, baş verən bahalaşma fərdi evlərin tikintisində müəyyən durğunluğa səbəb olacaq: "İdxal tikinti materiallarının qiymətinin bahalaşması həm obyektiv amillər, həm də bazarın özündən doğan subyektiv cəhətlərlə bağlıdır. Başlıca obyektiv səbəb Rusiyada tikinti materiallarının qiymətində qeydə alınan bahalaşma ilə bağlıdır. Bu ölkədə tikinti materiallarının qiymətinin yüksəlməsi istər-istəməz ölkəmizə idxal olunan həmin materialların qiymətinin qalxmasına gətirib çıxarır. Tikinti materiallarının bahalaşmasında mövsümü amillərin də rolu vardır. Adətən mart ayından başlayaraq tikinti sektorunda canlanma yaranır. Fərdi evlərin tikintisi də əsasən yaz fəslində daha intensiv xarakter alır. Bu baxımdan iş adamları da yeni mövsümün başlanması səbəbindən qiymət artımlarına gedirlər. Bu da həmin sahədə çalışan sahibkarların mövsümqabağı daha çox gəlir əldə etmək istəyindən irəli gəlir. İdxal tikinti materiallarında qiymət artımları birmənalı şəkildə fərdi tikinti sektoruna mənfi mənada təsir göstərəcək. Hazırda fərdi evlərin tikintisinin hündürmərtəbəli yaşayış binalarının tikintisilə müqayisədə daha çox olduğunu nəzərə alsaq, tikinti materialların qiymətinin bahalaşması məhz fərdi yaşayış evləri tikmək niyyətində olanlara ciddi təsir göstərəcək. Bu hal fərdi evlərin tikintisi prosesində mövsümi olsa da, hər halda durğunluğun yaranmasına gətirib çıxaracaq. Belədə fərdi evlərin qiymətində də müəyyən artımlar olacaq. Bu qiymət bahalaşmasının həmçinin fərdi əmlak inşaat sektoruna da mənfi təsiri olacaq, onun fəaliyyəti zəifləyəcək"..jpg)
