Əlaqə Arxiv
news Image
2013.05.27
15:42
| A A A
Qayınatasını öldürən gəlinin acı taleyi – Cinayət tarixi
Anası ilə evlənmək istəyən qayınatasını öldürən gəlinin cinayəti...

Qusar rayonunda yaşayan Qərib İbrahimxəlil oğlu Fərzəliyevin həyat yoldaşı kiçik oğlu Mahirə toy edəndən bir müddət sonra dünyasını dəyişib.

Həyat yoldaşı vəfat edəndən sonra Qərib kişi oğlu Mahir və gəlini Afətlə bir evdə yaşayıb.

İçkiyə meyilli olan Qərib kişi hər gün evə sərxoş gəlib. O, sərxoş olanda gəlinin yanında söyüş söyüb. Bu səbəbdən də Qəriblə oğlu Mahir arasında tez-tez mübahisələr baş verib.

Ata oğluna bir daha söyüş söyməyəcəyinə söz versə də içki içəndən sonra verdiyi sözü unudub. Sərxoş qayınataya dözməyən gəlin evdən qaçıb. Mahir Fərzəliyev bir müddət subay yaşamalı olub.

Oğlunun onun ucbatından tək yaşadığını görən ata, ona yenidən evlənsə bir daha içki içməyəcəyinə söz verib. Mahirin birinci həyat yoldaşı bir daha o evə qayıtmayacağını bildirəndə Mahir başqası ilə ailə həyatı qurub.

Evin yeni gəlini Şəhla Şirinova olub. Yeni gəlin gələndən sonra Qərib kişi uzun müddət içki içməyib. Oğlu və gəlini ilə mehriban dolanıb. Bir gün toya gedən Qərib kişi sərxoş qayıdıb. Və bundan sonra hər gün içki içməyə başlayıb.

Sərxoş olan Qərib əvvəlki kimi yenə söyüş söyməyə başlayıb. Birinci gəlindən fərqli olaraq ikinci gəlin daha diribaş olub. Qayınata bir deyəndə o iki deyib. Bu səbəbdən də evdə narazılıqlar get-gedə artıb.

Bir gün günorta vaxtı evə sərxoş gələn Qərib kişi gəlininə "sənin ananla evlənəcəyəm" deyib.

Gəlin ona "anam qoca arvaddır, onunla nə işin var. Özünə arvad tapa bilmirsən, gəlib mənim anama sataşırsan" cavabını verib.

Qərib öz növbəsində gəlininə söyüşlə cavab verib. Gəlinini söyən Qərib öz otağına gedib. Əsəbiləşən gəlin əlinə dəmir parçası götürərək evin arxasına keçib. Oradan qayınatasının otağının pəncərəsinə daş ataraq şüşəni sındırıb. Şüşənin sındığını görən Qərib otaqdan çıxıb gəlini vurmaq istəyəndə, Şəhla əlində olan dəmir parçası ilə ona zərbələr endirib.
 
Üçüncü zərbədən sonra sakitləşən gəlin qayınatasına su gətirib. Axşam evə gələn oğlu atasının halının pis olmasını görəndə onu Qusar rayon mərkəzi xəstəxanasına aparıb. Həkimlər yaşlı kişinin döyüldüyünü görəndə polisə məlumat veriblər.

Bir gün sonra vəziyyəti yaxşılaşan Qərib kişini xəstəxanada polislər dindirib. Gəlinini ələ vermək istəməyən qayınata polislərə yıxıldığını bildirib. Həmin günün axşamı isə xəstəxanadan qaçıb.

Şəhla Şirinova evə gələn qayınatasına aralarında heç nə baş verməmiş kimi qulluq edib. 5 gün sonra Qərib Fərzəliyevin halı yenidən pisləşib. Oğlanları onu xəstəxanaya aparanda artıq gec olub. Qərib Fərzəliyev xəstəxanada dünyasını dəyişib.    

Hadisə barədə məlumat alan polis və prokurorluq əməkdaşları araşdırmalara başlayıb və nəticədə Qərib kişinin ölümündə Şəhla Şirinovanın günahı olması qənaətinə gələrək onu həbs ediblər.

İstintaq orqanı Şəhla Şirinovanın əməlini Cinayət Məcəlləsinin 120.1-ci (qəsdən adam öldürmə) maddəsi ilə qiymətləndirib.

Şəhla Şirinova məhkəmədə qayınatasını öldürmək fikrində olmadığını, anası ilə evlənəcəyini dediyi üçün onu qorxutmaq istədiyi bildirib. Onun sözlərinə görə, əgər Qərib kişini öldürmək istəsəydi evdə onlardan başqa heç kim olmadığından onu ölənəcən döyərdi.

Gəlinlərinin bu sözləri Qərib Fərzəliyevin böyük oğlu Tərlanı əsəbiləşdirib. Tərlan bildirib ki, gəlinləri bu yolla özünü müdafiə edir. 100-ə yaxın yaşı olan atalarının evlənmək fikri olmayıb. Tərlan atasının əvvəllər də Şəhla tərəfindən döyülməsini bildirib.

Şəhla da cavabında deyib ki, "əgər bilirdinsə mən atanı döyürəm niyə aparıb yanında saxlamırdın" - deyə soruşub.

Tərlan susanda Şəhla onun yerinə özü cavab verib ki, çünki bütün günü içib pis-pis söyüşlər söyürdü, ona görə, indi də gəlib burada ağlayırsan yalandan.

Məhkəmə Şəhlanın əri, mərhum Qəribin oğlu Mahirin də ifadəsini dinləyib. Mahir birinci ailəsinin atasının evdə tez-tez söyüş söyməsi ucbatından dağılmasını bildirib. Şəhlaya gəldik isə Mahir ona qanunla nəzərdə tutulan qaydada cəza verilməsini istəyib.

Bütün tərəfləri dinləyən məhkəmə Şəhla Şirinovanı Cinayət Məcəlləsinin 126.3-cü (qəsdən sağlamlığa ağır zərərvurmanın ehtiyatsızlıqdan zərərçəkən şəxsin ölümünə səbəb olması) maddəsi ilə təqsirli bilərək 10 il müddətinə azadlıqdan məhrum edib.

Sizin Reklam Yeriniz