Xeyli sayda mina və partlamamış sursat aşkarlanıb
ANAMA ermənilərin işğal etdikləri ərazilərdən çaylarla axıtdıqları xeyli sayda mina və partlamamış sursat aşkarlayıb
Azərbaycan Ərazilərinin Minalardan Təmizlənməsi üzrə Milli
Agentliyin (ANAMA) əməkdaşları Xaçın çay və Tərtər çayı vasitəsi
ilə ermənilərin işğal altında saxladıqları ərazilərdən gələn xeyli
sayda mina və partlamamış döyüş sursatı aşkarlayıblar. Bu
barədə APA-ya ANAMA-nın baş
əməliyyat mütəxəssisi Adil Aslanov məlumat verib. A. Aslanovun
sözlərinə görə, çaylarda işğal altında olmayan ərazilərə axıdılan
minalardan bəziləri öz özünə partlasa da, xeyli sayda mina və
sursat götürülüb. Tapılmış sursatlar arasında partlamamış 122 mm
çaplı "Qrad" raketi, 57 mm çaplı raket, F-1 tipli əl qumbaraları da
var. ANAMA nümayəndəsinin sözlərinə görə, əvvəlki illərdə də
ermənilərin çaylarda suyun səviyyəsinin artmasından istifadə edərək
Azərbaycan Ordusunun nəzarəti altındakı ərazilərə partlayıcılar
axıtması faktları qeydə alınıb. Çaylardan tapılmış sursatlar
bu gün Ağdam rayonundakı xüsusi poliqonda partladılaraq
zərərsizləşdirilib. ANAMA-nın Çevik Əməliyyat Qrupu tərəfindən
Tərtər çay və Xaçın çaylarının su hövzələrində yoxlamalar davam
etdirilir.