"Görəsən, dünyanın hansı şəhərində Bakıdakı, bütövlükdə
Azərbaycandakı qədər qondarma şadlıq evləri və restoran adlarına
rast gəlmək olar? Mən təsəvvürümə gətirə bilmirəm". Bunu xalq
şairi, millət vəkili Sabir Rüstəmxanlı söyləyib.
Sabir Rüstəmxanlı deyib ki, nikah bağlamaq, ailə qurmaq,
evlənmək müqəddəs bir işdir və ona kölgə düşməsini, onun adının
hallanmasını da heç kim istəmir, yaxud, istəməz. Hər kəs istəyər
ki, pak, təmiz bir yerdə bu izdivac baş tutsun və o, ömürlük yadda
qalsın: "Amma bir baxın, Bakıda nə qədər köhnə, antik fahişələrin
adına toyxanalar - restoran, şadlıq evləri var?! "Afrodita",
"Kleopatra", nə bilim, daha nələr... Bunların bəzilərini də bəzən
azərbaycanlı olmayan, bizim dilimizi sevməyən insanlar edirlər,
bizim millətimizi təhqir etmək istəyirlər. Açırlar şadlıq evlərini,
restoranları və onlara ya dədə-babalarının adlarını, yaxud da, öz
dillərində bir şey uydurub tapmayanda, itin dili olsun, qurdun dili
olsun, təki azərbaycanlıların dili olmasın, qoyurlar. Bunların da
arxasında Azərbaycana və azərbaycanlılara xroniki nifrəti olan
adamlar dayanır. Görünür, onların içində azərbaycanlılara bir
xroniki nifrət var ki, bu eybəcər adları, fahişələrin adlarını bu
şadlıq evlərinə, restoranlara "pərçim" edirlər və bizim
uşaqlarımız, övladlarımız da məcbur olub gedib orada toy edirlər.
Hesab edirəm ki, bunlar təcili yığışdırılmalı, bu məsələ ilə bağlı
ciddi ölçü götürülməlidir".