YAP qurultayında partiyanın rəsmi namizədini elan edəcək
“Prezident seçkilərində YAP-ın rəsmi namizədinin prezident İlham Əliyevin olacağını əvvəlcədən bəyan etmişik”
"2013-cü il əvvəlki illərdə yaradılmış sosial-iqtisadi baza
üzərində irəliyə getmək üçün əsaslı illərdən olacaq". Bunu
SalamNews-a müsahibəsində Yeni Azərbaycan Partiyasının icraçı
katibinin müavini, Milli Məclisin deputatı Mübariz Qurbanlı deyib:
"Gələn il həm də siyasi hadisələr baxımından yaddaqalan bir il
olacaq. 2013-cü ildə Azərbaycanda prezident seçkiləri keçiriləcək.
Prezident seçkilərində YAP-ın rəsmi namizədinin prezidentimiz,
partiyamızın sədri cənab İlham Əliyevin olacağını əvvəlcədən bəyan
etmişik. Seçki Məcəlləsinə görə, namizədlərin irəli sürülməsi
qaydaları var. Bu qaydalara müvafiq olaraq, 2013-ci ildə
keçiriləcək qurultayında partiyamızın rəsmi namizədini elan
edəcəyik, amma indidən də biz deyirik ki, bizim namizədimiz cənab
İlham Əliyev olacaq. Seçkilərə hazırlıq yalnız seçki ilində olmur.
Biz 2012-ci ildən bəri seçkilərlə bağlı bəzi işlərimizi görmüşük.
Bizim üzvlərimizin sayı artıq 600 min nəfərə yaxındır. Azərbaycanın
elə bir rayonu yoxdur ki, orada YAP-ın təşkilatı olmasın. Bizim
rayon, şəhər təşkilatlarımız kifayət qədər güclüdür və partiyamızın
seçkilərdə qələbə çalması üçün potensialı böyükdür. Hesab edirik
ki, növbəti ildə seçkilərdə YAP-ın namizədi cənab İlham Əliyevə
yalnız bu partiyanın üzvləri deyil, bütövlükdə Azərbaycan
seçicilərinin böyük əksəriyyəti səs verəcək və o, qələbəsini təmin
edə biləcək. 2013-cü il eyni zamanda, ulu öndər Heydər Əliyevin
anadan olmasının 90 illiyi ilə də əlamətdardır. Bununla bağlı YAP
bəzi yeni tədbirlərini müəyyən edib ki, onları 2013-cü ildə həyata
keçirəcəyik. Əlbəttə, cari vəzifələr və bir neçə istiqamətdə
işlərimiz var ki, onları da görmək niyyətindəyik".