Rasim Balayev Azərbaycan Kinematoqrafçılar İttifaqını tərk etdi
"Son zamanlar Rüstəm İbrahimbəyovun təsis etdiyi və mənim katib
olduğum Azərbaycan Kinematoqrafçılar İttifaqı barədə mediada
müxtəlif söz-söhbətlər dolaşmaqdadır. Bildirirəm ki, mən Rüstəm
İbrahimbəyovu istedadlı dramaturq və rejissor kimi tanımışam,
hazırda da bu fikirdəyəm.
Biz uzun müddət Azərbaycan Kinematoqrafçılar İttifaqında birgə
çalışmışıq və İttifaqın yaranmasında məqsəd Azərbaycan kino
sənətinə dəstək və töhfə vermək olub". Bunu "Azərtac" Dövlət
Agentliyinə göndərdiyi bəyanatında xalq artisti Rasim Balayev qeyd
edib. R. Balayev bildirib ki, o bir Azərbaycan ziyalısı və kino
sənətinin inkişafında rolu olan şəxs kimi hər bir ziyalının lazım
gəldikdə millətinin, xalqının sözünü deməyi bacarmalı olduğunu
düşünür: "Lakin bu gün dünyada Azərbaycanın uğurlarını gözü
götürməyən, hər addımda Azərbaycanı özündən asılı görmək istəyən
qüvvələrin kifayət qədər çox olduğu bir dövrdə hesab edirəm ki, hər
bir Azərbaycan ziyalısının borcu möhtərəm cənab Prezidentin səsinə
səs vermək, Azərbaycan həqiqətlərinin dünyaya çatdırılmasında onun
yanında olmaqdır. Bu vəzifə üçün isə hər kəs öz sahəsində bilik və
bacarığını ölkəmizin inkişafına yönəltməlidir. Şəxsiyyətinə hörmət
bəslədiyim Rüstəm İbrahimbəyovun son zamanlar daha çox siyasətə
qoşulmasını böyük təəssüf hissi ilə qarşılayır və hesab edirəm ki,
çoxminli tamaşaçı sevgisini qazanan bir sənətkar, ziyalı olaraq bu
təşkilatı tərk etməli, bütün bacarığımı Azərbaycan mədəniyyətinin,
kino sənətinin inkişafına və təbliğinə yönəltməliyəm".
R. Balayev mediadan və ictimaiyyətdən bu bəyanatını
siyasiləşdirməməyi, müraciətinin sırf yaradıcılıqla məşğul olmaq
istəyimdən irəli gəldiyini nəzərə almalarını xahiş edib.