Bu gün 20 yanvar hadisələrinin 23-cü ildönümüdür. Movqe.az-ın
məlumatına görə, səhər saatlarından 20 yanvar şəhidlərinin
məzarlarını ziyarət başlayıb. Azərbaycan prezidenti İlham Əliyev də
Şəhidlər xiyabanına gələrək 20 yanvar faciəsinin qurbanlarının
qəbirlərini ziyarət edib, məzarları üzərinə qərənfillər düzüb.
Prezident İlham Əliyev "Əbədi məşəl" kompleksi önünə əklil qoyub,
Vətən yolunda qurban getmiş şəhidlərin xatirəsinə ehtiramını
bildirib. Azərbaycan hökumətinin üzvləri, parlamentin deputatları,
diplomatik korpusun nümayəndələri də Şəhidlər xiyabanını ziyarət
ediblər. Qeyd edək ki, ziyarət axşam saatlarına kimi davam edəcək.
Ziyarətlə əlaqədar Bakının bir sıra küçələrində nəqliyyatın
hərəkəti məhdudlaşdırılıb. Saat 12.00 radələrində isə Bakı
şəhərində şəhidlərin xatirəsini yad etmək üçün bir dəqiqəlik sükut
elan olunacaq.