Son vaxtlar dünya bazarında neftin qiyməti durmadan bahalaşır. Azərbaycan neftinin orta qiyməti bir barrel üçün təxmiən 114 dollar təşkil edir ki, bu da dövlət büdcəsində proqnozlaşdırılan qiymətdən yüksəkdir. Bu qiymətə neftini dünya bazarına çıxarmaq Azərbaycan üçün olduqca sərfəlidir.

Amma neft hasilatının son illlər aşağı düşdüyünü nəzərə alsaq, yaranan stiuasiya kifayət qədər maraq doğurur.

Qeyd edək ki, Azərbaycanın Xəzər dənizilə yanaşı, quruda da neft ehtiyatları var. Amma ondan tam istifadə olunmur və əsas səbəb kimi də rentabelliyin aşağı olması göstərilir. Dünya bazarlarında neftin qiymətinin artması fonunda isə vəziyyət dəyişə bilər.

Ekspertlər hesab edirlər ki, quruda neft və qaz hasilatını artırmaq mümkündür. Xüsusilə dünya bazarında qiymətlərin bahalaşdığı bir vaxtda neft və qaz hasilatını artırmaq məqsədəuyğun hesab edilir.

Azərbaycanın neft şirkətlərinin quruda neft və qaz hasil etmək sahəsində dərin təcrübəsinin olduğunu deyən neft məsələləri üzrə ekspert İlham Şabanın sözlərinə görə, quruda neft hasilatının həcmini artırmaq üçün geoloji-kəşfiyyat işlərini sürətləndirmək lazımdır: "Azərbaycanın quruda neft ehtiyatları ilə bağlı müxtəlif rəqəmlər səsləndirilir. Qurudakı neft ehtiyatlarının 145 milyon ton, təbii qaz ehtiyatlarının isə 47 milyard kubmetr olduğu proqnozlaşdırılır. Başqa rəqəmlər də səsləndirirlər. Proqnozlar müxtəlifdir. Dövlət Neft Şirkətindən bildirirlər ki, yerin dərinliklərinə getdikcə yeni ehtiyatlar tapmaq olar. Məndə olan məlumatlara görə, 2013-cü ildə ARDNŞ quruda bir neçə geoloji kəşfiyyat işləri aparacaq, quyular qazacaq. Neft şirkətinini gəlirləri artdıqca kəşfiyyat-qazma işlərinə investisiyanı artırır. Qazılan quyuların heç də hamısı proqnozları doğrultmur. Quyu qazıntısı böyük xərclər aparır. Mövcud neft quyularının əksəriyyətində neft qurtarıb. Neft borularının çatdığı nöqtəyə qədər olan neft daşınıb. Daha dərin qatlara getmək lazımdır. Bunun üçün isə pul tələb olunur".