Məlum olduğu kimi Ermənistanın tutduğu qeyri-konstruktiv mövqe üzündən danışıqlar yolu ilə Qarabağ münaqişəsinin çözümü uzanır. Azərbaycan isə ən yüksək səviyyədə bəyan edir ki, əgər Ermənistan bu mövqeyindən geri çəkilməsə, onda yeni müharibənin başlanması qaçılmaz olacaq.
Müdafiə naziri Səfər Əbiyev də Xorvatiyanın müdafiə naziri Ante Kotromanoviçinlə görüşdə bildirib ki, Dağlıq Qarabağ münaqişəsi sülh şəraitində həll olunmadığı təqdirdə ordunun imkanlarından istifadə ediləcəyi qaçılmazdır.
Amerikanın məşhur "National interest" jurnalı da yazır ki, Dağlıq Qarabağ münaqişəsi yeni müharibə mərhələsinə qədəm qoyub. Bildirilir ki, həmsədr ölkələr bütün səylərini həll variantı axtarmağa yönəltsə də, nəticə yoxdur: "Məsələnin daha ciddi tərəfi münaqişə tərəflərinin vaistəçilər olmadan bir araya gələ bilməməsidir. Hadisələrin gedişi göstərir ki, Azərbaycan və Ermənistan tərəfi heç vaxt təkbətək danışıqlar masası arxasında oturmayacaq. Bu dalana dirənmiş vəziyyət son illər daha da kəskinləşib. Müharibə ərəfəsi vəziyyəti xatırladır". Qeyd olunur ki, Dağlıq Qarabağ münaqişəsi ətrafında vəziyyət o qədər ciddiləşib ki, məsələ ilə ABŞ prezidenti Barak Obamanın xarici siyasət məsələləri üzrə komandası məşğul olur.
Bu arada isə Rusiya Dövlət Dumasının sədri Serqey Narışkin Parisə işğüzar səfər çərçivəsində Fransa Milli Yığıncağının deputatları ilə görüşdə Qarabağ münaqişəsində ziddiyyətli məqamlara dair olduqca maraqlı açıqlamalar verib. Onun sözlərinə görə, Ermənistan və Azərbaycan arasında sülh razılaşması üzərində işdə maneə referendumun keçirilməsi məsələsidir. Lakin, bunu həll etmək mümkündür: "Münaqişə tez və asan yolla həll edilmək həddini aşıb". Onun fikrincə, mövcud vəziyyətə real baxmaq lazımdır. Və bu münaqişənin tezliklə həll edilməsini gözləmək düzgün olmazdı.
Spiker bildirib ki, bu gün üçtərəfli danışıqların nəticələri mövcuddur - çoxlu sayda razılşadırılan mövqe var, onların vasitəsilə digər addımlar atmaq mümkündür. "Nəticələr var və onlar heç də pis deyil". Nümayəndə heyətinin üzvü, MDB və Həmvətənlərlə Əlaqələr üzrə Komitəsinin sədri Leonid Slutski öz növbəsində bəyan edib ki, Dağlıq Qarabağ münaqişəsinin nizamlanmasına dair ən ciddi nəticə - hazırda orada müharibənin olmamasıdır. Rusiyalı deputatın sözlərinə görə, bu gün Bakı və İrəvan arasında sülh müqaviləsinin layihəsi mövcuddur, lakin burada yalnız iki-üç bənd razılaşdırılıb.
L.Slutski qeyd edib ki, ilk addım Dağlıq Qarabağ ətrafında yerləşən rayonların silahlı qüvvələrdən azad edilməsinə yönəlib. Lakin sənədin əsas bəndi referenduma aiddir və bu maneə yaradır. Komitə sədri bildirib ki, müqavilə layihəsi çərçivəsində müvafiq təkliflərin hazırlanması zamanı tərəflər Fransada referendum təşkili təcrübəsinə əsaslanıblar.
L.Slutski ümid edir ki, Dağlıq Qarabağ probleminin həlli məqsədi ilə irəliyə hərəkət olacaq və bunun üçün əsas var. "Ümid edirəm ki, bu ilin sonuna qədər işi ölü nöqtədən tərpətmək və referendum haqqında müqavilənin bəndi üzrə irəliləmək mümkün olacaq".
Hələlik isə Ermənistan münaqişənin həllinə maneə yaradan əsas tərəf olaraq qalır. Rusiyalı politoloq Aleksey Vlasov bildirir ki, Ermənistanda olduqca çətin sosial-iqtisadi vəziyyət hökm sürür və bu da məsələyə müəyyən problemlər əlavə edir: "İqtisadiyyata gəldikdə, bu barədə istər Ermənistanın daxilində, istərsə də respublikadakı sosial-iqtisadi vəziyyətin inkişafını diqqətlə izləyən beynəlxalq ekspertlər tərəfindən müxtəlif fikirlər irəli sürülür. Hesab edirəm ki, vəziyyət olduqca mürəkkəbdir. Vəziyyətin mürəkkəbliyi həm miqrasiya, həm də işsizliyin göstəricilərinə şamil olunur. Əsas məsələ əhalinin ağır sosial-iqtisadi vəziyyətlə əlaqədar respublikanı tərk etməsidir. Bu problemlər heç yerə gedən deyil və onları ölkənin yenə köhnə prezidenti Serj Sarkisyan və tədricən hakimiyyətə gələn idarəetmə elitası həll etməlidir. Yeri gəlmişkən, Ermənistanda hələ də elitanın yenilənməsi prosesi gedir. Bu elita yaşlı nəslin erməni rəhbərlərindən fərqli olan, fərqli baxışlı, fərqli təhsil almış və Ermənistanın geosiyasi perspektivlərinə fərqli tərəfdən yanaşan insanlardan ibarət olacaq. Beləliklə, burada mürəkkəb, ziddiyyətli və çox çətin vəziyyət yaranıb və seçkilər - siyasi prosesin nəticəsi deyil, sadəcə, başlanğıc nöqtəsidir". Onun sözləriən görə, hazırda Ermənistanda əsas diqqət prezident seçkilərinə yönəlib..jpg)
