Telekanallar "Reklam haqqında"qanuna edilən son dəyişiklikdən sonra özəl klinikaların reklamının məhdudlaşmasına münasibət bildirməkdən yayınırlar. Movqe.az-ın ""Reklam haqqında" qanuna edilən dəyişiklikdən sonra özəl tibb fəaliyyəti subyektləri tərəfindən göstərilən tibbi xidmətlərin reklamının məhdudlaşdırılması telekanalların reklam gəlirlərinin azalmasına gətirib çıxara bilərmi" sualına telekanal səlahiyyətliləri cavab verməkdən yayınıblar. ANS Şirkətlər Qrupu prezidentinin müşaviri Mais Məmmədov  bildirib ki, hələki ona reklam departamentindən bu barədə məlumat verilməyib: "Məlumat verildikdən sonra sizə deyəcəyəm. Amma indi deyə bilmərəm gəlirləri azaldacaq, ya yox".
"Space" telekanalının icraçı direktoru Kamil Şahverdiyev isə suala qulaq asdıqdan sonra dəstəyi asıb.
İctimai Televiziyanın direktoru Ismayıl Ömərov isə bu dəyişikliyin  İTV-nin reklam gəlirlərinə necə təsir edəcəyindən xəbərsiz olduğunu söyləyib.
Azad Azərbaycan Telekanalından (ATV) bidiriblər ki, onların reklam məsələlərinə cavabdeh şirkət tamamilə başqa şirkətdir və telekanalla əlaqəsi yoxdur. Xatırladaq ki,qanunvericiliyə edilən son dəyişiklikdən sonra,özəl klinikaların reklamı müvafiq icra hakimiyyəti orqanının rəyi əsasında qanunvericiliklə müəyyən edilmiş qaydada həyata keçirilməlidir.