Sovet dövründə
əhalinin banklara yatırılan əmanətlərin ətrafında yaranan müəmma
çözülməyə doğru gedir. Hər halda müxtəlif səviyyədə verilən rəsmi
açıqlamalar bu qənaətə gəlməyə əsas verir. Xatırladaq ki, hələ ötən
həftə maliyyə naziri Samir Şərifov parlament komitələrinin birgə
iclasında 2012-ci ilin dövlət büdcəsi layihəsinin müzakirəsi zamanı
məsələ ilə bağlı kifayət qədər maraqlı bir açıqlama verdi.
Nazir qeyd etdi ki, Azərbaycanın dövlət büdcəsində sovet dövründən
qalmış bank əmanətlərinin qaytarılması ilə bağlı problem yoxdur:
"Milli Məclis müvafiq qanun qəbul etsə, bunun büdcə vasitəsilə
icrasında problem olmayacaq. Bunu tam məsuliyyətimlə deyirəm".
Nazirin bu sözləri əmanətlərinin nə vaxtsa qaytarılmasından inamını
itirən vətəndaşlarda yenidən ümid yaratdı.
Lakin Milli Məclis təmsilçilərinin açıqlamaları məsələnin həm
mürəkkəb olduğunu, eyni zamanda yaxın perspektivdə həll ehtimalının
yüksək olduğunu deməyə əsas verir. Məsələn, parlamentin iqtisadi
siyasət komitəsinin üzvü Əli Məsimli bildirir ki, 2008-ci il may
ayının 15-də "Sovet dövründən qalma əmanətlərin qaytarılması
haqqında" qanun layihəsini hazırlayaraq, Milli Məclisə təqdim edib:
"2005-ci ildə isə prezidentin əmanətlərin indeksləşdirilməsi barədə
sərəncamı olub, hökumət bununla bağlı komissiya yaradıb. Həmin
komissiyaya qanun layihəsinin hazırlanması və əmanətlərin
qaytarılmasının mexanizmlərinin müəyyənləşdirilməsi ilə bağlı üç ay
vaxt verilib. Lakin 2005-ci ildə verilən həmin sərəncam indiyə
qədər yerinə yetirilməyib, layihə və mexanizmi hazırlamalı olan
şəxslər isə günahı Milli Məclisin üstünə atırlar". Milli Məclisin
başqa bir iqtisadçı üzvü Vahid Əhmədov isə iqtisadi siyasət
komitəsinin rəhbərliyində 3-4 qanun layihəsinin olduğunu bildirib:
"Bu məsələ bir dəfə spiker Oqtay Əsədovun yanında da müzakirə
mövzusu olub, amma qanun layihəsi gündəliyə çıxarılmayıb. Əgər
problem yoxdursa, qanun layihəsini gündəliyə salsınlar, biz onu bir
həftə ərzində qəbul edək".
Xatırladaq ki, ötən il dövlət büdcəsinin müzakirələri zamanı
maliyyə nazirinin müavini Azər Bayramov mətbuata verdiyi açıqlamada
əmanətlərin geri qaytarılmasına mane olan əsas səbəb kimi bu sahədə
müvafiq qanunvericiliyin olmamasını göstərmişdi. İndiyə qədər də bu
məsələ həllini tapmayıb. Hələlik isə parlamentdə dövlət büdcəsinin
müzakirəsi fonunda yenidən belə fikirlər səslənir ki, hökumət sovet
dövründə banklara qoyulan əmanətlərin qaytarılması üçün vəsait
ayırmalıdır.
Noyabrın 22-si Milli Məclisin iclasında danışan deputat Əli Məsimli
yenidən sovet dövründə batmış əmanətlərin qaytarılması məsələsini
qaldırıb. Deputat belə bir qanun layihəsi hazırladıqlarını da
vurğulayıb: "Mən bu məsələdə hökumətə əməkdaşlıq təklif edirəm və
hazırladığım qanun layihəsinin müəllifliyindən imtina edirəm. Yəqin
ki, 125 deputat buna etiraz etməz. Üçüncü dəfə qanun layihəsini
daha təkmil formada iqtisadi siyasət komitəsinin sədri Ziyad
Səmədzadəyə təqdim edəcəm.
Əmanətlərin qaytarılması 2 milyon insanın taleyi ilə bağlıdır.
Kiminsə məsələni başqa birinin üzərinə atması ilə problem həll
olunmayacaq. İnsanlar gözləyirlər və real addımlar atmaq lazımdır.
Elə edək ki, bu binadan çıxanda 2012-ci il üçün bir məsələni həll
etdiyimizi, işıq gələn tərəfə getdiyimizi deyə bilək".
Məsələyə spiker Oqtay Əsədov münasibət bildirib: "Azərbaycanda
əhalinin sovet dövründə banklarda qalmış əmanətlərini qaytarmaq
üçün vəsait var və hökumət bu mexanizmin hazırlanması üçün iş
aparır, artıq mexanizm hazırlanıb, son formaya salınır. Artıq
yollar bilinir.
Bununla bağlı qanun qəbul olunmalıdır. Qanun layihəsi ilə yanaşı
indeksləşdirmə və qaytarılma mexanizmi hazırlanmalıdır. Mən maliyyə
naziri Samir Şərifovla danışmışam və demişəm ki, mexanizmi hökumət
hazırlamalıdır. Cənab prezidentin də bununla bağlı böyük
narahatlığı var. Mexanizm hazırlanandan sonra qanun layihəsi Milli
Məclisə çıxarıla bilər və biz onu qəbul edərik.
Bu məsələdən danışan zaman bir az ehtiyatlı olmalıyıq. Burada
jurnalistlər oturublar və mən hər şeyi açıqlaya bilmirəm.
Azərbaycan qədər qaçqını, miqrantı olan ölkə yoxdur. Biz elə
etməliyik ki, millətimizə, xalqımıza qaytardığımız pullar
Azərbaycanda qalsın, Azərbaycan vətəndaşlarına çatsın, başqa
tərəflərə getməsin. Biz ümumi Avropa hüquq məkanındayıq. Çox böyük
problemlərlə üzləşə bilərik. İlk növbədə bu problemləri həll etmək
lazım idi. Hökumət Milli Məclislə birlikdə bu məsələyə bir də
baxacaq və layihə deputatlara təqdim olunacaq. Xahiş edirəm, qanun
layihəsi hazır olmayınca bu məsələni çox çək-çevir etməyək".
Nazirlər Kabinetinin sabiq şöbə müdiri, iqtisadçı Oqtay Haqverdiyev
də bildirir ki, sovet dövründən qalmış əmanətlərin qaytarılması
üçün ilk növbədə qanun qəbul edilməlidir: "Qanun isə hələlik qəbul
edilməyib. Bu məsələ ilə bağlı 3 variantda qanun layihəsi
mövcuddur. Ancaq indiyədək bu qanun layihəsi Milli Məclisdə qəbul
edilmir. Görünür, əmanətlərin qaytarılması ilə bağlı hansısa
problemlər mövcuddur ki, bu proses ləngidilir".
Bir daha xatırladaq ki, Azərbaycan hökuməti əhalinin sovet
banklarında qalan əmanətlərinin qaytarılması ilə bağlı 1991-ci ildə
öz üzərinə öhdəlik götürüb. Prezident İlham Əliyev 2005-ci ildə
sovet banklarına qoyulan əmanətlərin qaytarılması ilə bağlı fərman
imzalayıb. Həmin fərmana əsasən, 1992-ci il yanvarın 1-dək keçmiş
SSRİ banklarında qalan əmanətlərin indeksləşdirilməsi məqsədilə
dövlət komissiyası yaradılıb və aidiyyəti qurumlara müvafiq
tədbirlərin görülməsi üçün tapşırıqlar verilib. Həmin fərmanın
imzalanmasından 6 ildən artıq vaxt keçməsinə baxmayaraq, əmanətlər
hələ də sahiblərinə qaytarılmayıb. Halbuki əmanətlərin geri
qaytarılması prosesi keçmiş sovet respublikaları arasında -
Baltikyanı ölkələrdə (Latva, Litva, Estoniya) və Rusiyada 1995,
Qazaxıstanda 1996, Ukraynada və Qırğızıstanda 1997-ci ildə başa
çatıb. 2002-ci ildə Moldova, 2005-ci ildə isə Özbəkistan əmanətləri
öz sahiblərinə qaytarıb.
Azərbaycanın da kifayət qədər maliyyə imkanları mövcuddur ki, həmin
əmanətləri qısa zaman kəsiyində qaytarsın.
Əmanətləri hansı məzənnə ilə qaytarmağın daha optimal variant ola
biləcəyinə gəlincə Oqtay Haqverdiyev bununla bağlı bildirir:
"Xatırladım ki, SSRİ dağılan zaman 1 dollar 70 qəpiyə bərabər idi.
Əmanətləri vətəndaşlara qaytaran zaman yerləşdirilən əmanətlərin
ümumi məbləğini dollara çevirmək lazımdır. Dolları isə indiki
məzənnə ilə manata çevirmək lazımdır. Bu prinsip əsasında
əmanətləri qaytarmağa başlamaq olar. Bu, məsələnin ən ədalətli
həlli yolu olardı. Ancaq dediyim üsulla hesablanarsa, bu çox böyük
məbləğə gətirib çıxara bilər. Ancaq burada nəzərə alınmalı bir
məqam da var ki, o zaman SSRİ rublu real olaraq dollardan baha
deyildi. SSRİ xarici ticarəti 70 qəpiyin 1 dollara nisbəti
məzənnəsi ilə aparırdı. SSRİ-nin daxilində isə bu məzənnədən
istifadə olunmurdu. Ümumiyyətlə, SSRİ-nin daxilində valyuta
dəyişməsi praktikası mövcud deyildi". Lakin qeyd olunduğu kimi əsas
məsələ müvafiq qanun qəbul olunmasıdır. Bununla bağlı qanun
layihələri hələ də iqtisadi siyasət komitəsində ilişib qalıb.