Bu gün bir sıra ölkələrin öz keyfiyyətli məhsulları ilə bütün dünyada tanınan, brendə çevrilmiş firmaları var. Belə firmalar ölkə iqtisadiyyatına da əhəmiyyətli gəlir gətirir. Məsələn, uzun zamandır brendə çevrilən "Adidas" firması Almaniyanın tannımış sənaye şirkətidir. İdman ayaqqabıları, geyimləri və digər inventarın istehsalı üzrə ixtisaslaşıb. Və yaxud da ki, bu gün Koreyanın KİA avtomobil şirkətinin, Almaniyanın "Mercesdes-Benz" şirkətinin istehsal etdiyi maşınlar bütün dünyada insanların istifadəsinə üstünlük verdikləri məhsullardır. Belə firmalar həm sənaye, həm kənd təsərrüfatı sahəsində mövcuddur. Azərbaycanda da bu kimi dünya brendləri daim yüksək rəğbət görüb və insanların alıcılıq qabiliyyəti bu məhsullarda daha çoxdur. Amma, nədənsə bizim yerli istehsalı həyata keçirən fimalar brendə çevrilə bilmirlər. Halbuki, bunun üçün istər sənaye, istər kənd təsərrüfatı sahəsində kifayət qədər imkanlar var. Belə brendlər olsaydı, bu, Azərbaycanın dünya miqyasında geniş şəkildə tanınması üçün də gözəl bir bir vasitə ola bilərdi.
Azad İstehlakçılar Birliyinin sədri Eyyub
Hüseynov Movqe.az-a bu sahədə Azərbaycanda olan vəziyyət və
görülən işlər barədə aşağıdakıları bildirib: "Azərbaycan Ümumdünya
Ticarət Təşkilatına daxil olmaq ərəfəsindədir. Yaxın illərdə
ölkəmiz bu qlobal quruma daxil olacaq. Ondan sonra bazar
liberallaşacaq və Azərbaycan brendinə böyük ehtiyac olacaqdır. Bu
gözləmə və reallıq vəziyyətinin təhlili onu göstərir ki, Azərbaycan
brendi tanınmadığı üçün Ümumdünya Ticarət Təşkilatının siyasəti
altında Azərbaycan malları zibilxanalara düşəcəkdir. Bu
dediklərimdən narahat olan Amerika Birləşmiş Ştatlarının İnkişaf
Agentliyi 5 ildir ki, Azərbaycanda rəqabətə davamlılıq tədbirlərini
həyata keçirir. Və Azərbaycan brendinin tanınması üçün iş aparır.
Azərbaycan brendini tanıtmaq üçün ərzaq mallarına keyfiyyət nişanı
deyilən bir nişan təsis etməyi bizdən xahiş ediblər. Artıq belə bir
nişan təsis olunubdur. Bu, Azərbaycan İstehlakçılarının Qida
Təhlükəsizliyi adlı keyfiyyət nişanı olacaq və gümüş, qızıl və
platin səviyyəli nişanlar olaraq təsis ediləcəkdir. Biz bu nişanı
almış malları dünyanın 150 ölkəsində, o cümlədən Azərbaycan
istehlakçıları arasında təbliğ edəcəyik. Bu yaxınlarda, noyabr
ayının 1-ində artıq bu nişan yerli istehsalçıya veriləcək. Bu
"Ulduz’ şokolad fabriki olcaq. "Ulduz" şokolad fabrikinə platin
nişan veriləcək. Bizim əməkdaşlarımız fabriklə bağlı uzun
qiymətləndirmə işi aparıblar. Biz "Ulduz" şokolad fabrikinin
məhsullarını, bütün dünyada təbliğ edəcəyik. Azərbaycan
Ümumdünya Ticarət Təşkilatına daxil olduqdan sonra artıq bu brendi
almış mallar dünya və yerli istehlakçıların rəğbətini qazandığı
üçün böyük, uğurlu bir biznesə gətirib çıxaracaqdır.
Çox təəssüflər olsun ki, bizdə sənaye malları sahəsində problemər yaşanır. Azərbaycanda istehsal olunan sənaye mallarının 40-50 %-i xarici brendlər adı altında satılır. Əhali sovet vaxtından fabriklərin tikdiyi bir ayağı uzun, biri qısa şalvarlardan, bir qolu uzun, biri qısa köynəklərdən, pencəklərdən beziblər. Yerli brendlər sovet vaxtından gözdən düşübdür. Lakin artıq Azərbaycanda dünya standartlarına uyğun olan mallar istehsal olunur. Bu, həm sənaye məhsullları, həm qida, həm kənd təsərrüfatı məhsullarına və s. aiddir. Düşünürəm ki, Azərbaycan höküməti elə iş aparmalıdır ki, Azərbaycan istehlakçıları bu brendləri tanımalıdır. Yerli malların təbliği çox zəif vəziyyətdədir. Ona görə də, Azərbaycan brendi tanınmır və məhsul istehlak edənlər xarici brendlərə üstünlük verirlər. Bu Azərbaycanın Ümumdünya Ticarət Təşkilatına daxil olduqdan sonra Azərbaycanın böyük faciəsi ola bilər. Ona görə də, Azad İstehlakçılar Birliyi yerli istehsal layihələrinə qoşulubdur. Və bu işi ən yaxın zamanda həyata keçirəcək".
İqtisadçı-ekspert Qadir İbrahimli saytımıza
verdiyi açıqlamada azərbaycanlı sahibkarların yalnız keyfiyyət
məsələsinə diqqət edəcəkləri, malları standartlara uyğun şəkildə
istehsal edəcəkləri halda bizim firmaların da brendə çevrilə
biləcəklərini deyib: "Brend bir günə, bir layihə ilə qısa müddətə
yaradılmır. Müəyyən firmalar uzun inkişaf yolu keçirlər, özlərinin
keyfiyyətli məhsulları ilə xidmətlərini tanıdırlar. Belə firmalar
zamanla brendə çevrilirlər. Firma bunun üçün uzun bir inkişaf yolu
keçməli, özünü təsdiq eləməlidir. Malların keyfiyyəti təsdiq
olunmalıdır ki, insanların həmin firmanın məhsullarına etimadı
olsun. Tutaq ki, "Adidas" firmasına keyfiyyətli idman geyimləri
istehsal etdiyindən etimad edilib və zamanla brendə çevrilib. Və
yaxud da ki, KİA avtomobillərini göstərmək olar. İnsanların onlara
etimad göstərməsinə səbəb keyfiyyətdir. "Mercedes-Benz"
avtomobilləri bugünkü səviyyəyə bir ilə, iki ilə çatmayıb . Uzun
inkişaf yolu keçib. Belə firmalar brend səviyyəsinə yüksək
keyfiyyətli standartları tətbiq etməklə gəlib çatıblar.
Azərbaycanda da hansı sahibkar istəyirsə ki, onun məhsulu brendə çevrilsin, o keyfiyyət haqqında, standartlar haqqında düşünməlidir ki, istehlakçıları inandıra bilsin ki, onların məhsullarına tam etibar etmək olar və heç vaxt müştərilərə keyfiyyətsiz mal və ya xidmət təklif etməyəcəklər".