Son illər ərzində insanların mənzilə olan tələbatı artan xətt üzrə inkişaf etməkdədir. Lakin buna baxmayaraq, tikilən mənzil sahəsi ötən illərlə müqayisədə artmaq əvəzinə hələ də azalmaqdadır. Bu gün aparılan müşahidələr hələ də tələbə uyğun olmayan həddə yeni mənzil tikildiyini göstərir.  Əhaliyə satılan isə daha çox indiyə qədər inşa edilən və hazır əldə olan az sayda mənzillərdir. Tələb çox olsa da, insanların qarşısına qoyulan seçimlər çox azdır. Xatırladaq ki, 2008-ci ilə kimi bazarda mənzil bumu müşahidə olunurdu. Tələb və təklif məfhumları bir-birini tamamlayırdı. Son illərdə isə bu balans pozulub. Nəticədə əldə olan evlər də əhaliyə yüksək qiymətə təqdim olunur. Ekspertlər bu fonda yeni tikinti bumu gözləsələr də, hələlik bundan xəbər yoxdur. 

"Əmlak Bazarı İştirakçıları" İctimai Birliyinin üzvü Rövşən Talıbzadə  Movqe.az-a mövcud vəziyyəti belə şərh edir: "Bu gün evlərin bahalaşmasının əsas səbəbləri içərisində tələbin artması, təklifin azalması əsas amillərdən biridir. Mənzil fondu geniş olmalı, əhali qarşısında seçimlər qoyulmalı, təlkif artmalıdır ki, qiymətlərin aşağı düşməsi və yaxud da stabil qalması müşahidə olunsun. Yəni, əlində pul vəsaiti toplamış şəxs bu gün seçim etməyə ev tapa bilmir. İstədiyi ərazidə çox az, məhdud təkliflərlə rastlaşır. Alıcı üçün geniş çeşid yaradılmalıdır. Rəqabətliyin artması, həm də qiymətlərin stabil qalması üçün təklif çox olmalıdır. Onun üçün də, əlbəttə ki, yeni mənzillərin tikilməsinə böyük ehtiyyac var. Burda söhbət ekonom tipli evlərdən, mənzillərdən gedir. Əhalinin çoxu kvadrat metri 500, 600, 700 manat civarında olan evlərə daha çox üstünlük verir. Belə evlərin tikilməsinə ehtiyac var. İkinci növbədə, uzunmüddətlii kreditə verilən evlərin tikilməsinə ehtiyac var. Yəni, aztəminatlı ailələr üçün uzun müddətli kredit yolu ilə evlər tikilə bilər. Bundan başqa sosial kirayə evləri tikilə bilər. Bizim qanunvericilikdə mənzil fondunun genişləndirilməsi ilə bağlı, insanların tələblərinin qarşılanması ilə bağlı maddələr var. Sadəcə olaraq, son zamanlarda investisiya yatırımı bir qədər məhdudlaşıbdır. Sahibkarların bu sahəyə investisiya yatırması 2005-ci ildə müşahidə olunan tikinti bumuna nisbətən məhdudlaşıb . Bu da onunla əlaqədardır ki, bu gün şəhər mərkəzində tikintilərin sıxlığı müşahidə olunur. Birinci növbədə, sahil bağı ətrafında, bulvar ətrafında ümumiyyətlə, çoxmərtbəli binaların tikintisiə məhdudiyyətlər qoyulub. Belə ki, artıq 7 mərtəbədən hündür binaların tikintisinə icazə verilmir. Yəni, bu kimi hallar investorları daha kənara çəkilməyə məcbur edir. Onlara investisiyalarını daha çox şəhərdən kənar ərazilərə yatırmağa vadar edir". 

Ekspert sahibkarlara mənzil fondunu genişləndirmək üçün müəyyən şərait yaradılmasına ehtiyac olduğunu da bildirib: "İnvestorlar üçün müəyyən şərait yaradılmalıdır. Onlara müxtəlif uzunmüddətli kreditlər verilməli, yaxud müxtəlif təkanverici addımlar atılmalıdır ki, tikinti sektoruna meyil etsinlər və mənzil fondunun həcmini artırsınlar. Məsələn, bu yaxınlarda Müşfiqabad qəsəbəsində böyük bir şəhərcik salındı. Bu, qaçqınların məskunlaşması üçün dövlətin təşəbbüsü ilə həyata keçirildi. Amma, bu yönlü addımların atılması genişləndirilsə, həm əhalinin tələbatı ödənər, həm də mənzil bazarında təbii ki, qiymətlər də bir qədər ucuzlaşar". 

"Əmlak Bazarı İştirakçıları" İctimai Birliyinin icraçı direktoru Ramil Osmanlı isə, saytımıza veridiy açıqlamada mənzil bazarında bahalaşmaya səbəb kimi, ipoteka kreditləşməsini göstərib: "Qiymət artımının tikinti sektorunda azalmaya heç bir aidiyyatı yoxdur. Çünki, qiyməti artan tikililər mənzil bazarında təkrar satılan mənzillərdir. Burda əsas rol oynayan məsələ ipoteka kreditləşməsidir. Yəni, bilirsiniz ki, ipoteka kreditləşməsi nəticəsində mənzillərin dövriyyə imkanları məhdudlaşır. Yəni, bir mənzil satılır, onun yenidən bazara qayıtma müddəti təxminən 25 il çəkir. Bu baxımdan təxminən nəzərə alsaq ki, ipoteka başlayan dövrdən bu günə qədər mənzil bazarında 12 minə qədər mənzil satılıbdır, artıq bu o deməkdir ki, bazardakı 12 min mənzil hələ 20 il bundan sonraya qədər dövriyyədən çıxarılır. Yalnız 20 ildən sora bazara qayıdır. Və bu bazarda təklif məhfumunu kəskin şəkildə azaldır. Təklif azaldığına görə də, həm müraciətlərin sayı artır, həm süni tələb artır. Eyni zamanda, təbii ki, bu qiymət artımına gətirib çıxarır. Amma bunun yaxın gələcək üçün daha da dərinləşməsi və qiymət artımının daha dinamik xarakter alması proqnozlaşıdırlmır. Burda müəyyən səbəblər var. Paytaxtdakı söküntü işləri ilə əlaqədar ola bilsin ki, müəyyən qədər cüzi qiymət dəyişimi olsun. Amma bu, davamlı xarakter daşımayacaq".