Bu gün Azərbaycanda istehlak kreditlərinin həcmi gündən-günə artmaqdadır. Artıq insanlar ciddi bir səbəb olmadan, hər hansı avadanlıq, ev əşyası və ya bahalı telefon almaq üçün belə kreditə müraciət edirlər. Bu, əlbəttə ki, əlində nağd pul olmayan zamanlarda ehtiyaclarını ödəmək cəhətdən  əhaliyə sərf edir. Lakin, banklar tərəfindən verilən kreditlərin faiz dərəcələri yüksək olduğundan, alınan pulların zamanında geri qaytarıla bilməməsi gələcəkdə banklar üçün ciddi problemə çevrilə bilər. 

İqtisadçı-ekspert Natiq Cəfərli Movqe.az-a açıqlamasında bildirir ki, insanların həddindən artıq istehlak kreditlərinə yönəlməsi bankların maaliyyə sistemi üçün təhdid yaradır: "İstehlak kreditlərinin artması və onun geri qayıtmayan hissəsinin müvafiq olaraq ildən-ilə artımı ciddi təşviş doğurur. Çünki, bəzi banklarda qaytarılmamış kreditlərin həcmi normadan çoxdur. Dünyada qəbul olunmuş praktikaya görə, həddən artıq qaytarılmayan kredit miqdarı olduqda həyəcanlı vəziyyət yaranır və banklarda bununla bağlı tədbirlər görülür. Bizdə isə artıq qaytarılmayan kreditlərin miqdarı beynəlxalq normaların iki dəfə üzərindədir. Bunun səbəbi həm psixoloji məsələlərdən irəli gəlir, həm də əhalinin iqtisadi durumu ilə əlaqədadır. Psixoloji durum odur ki, çox təəsüf ki, bizdə insanlarda rəqabət psixologiyası var. Əgər qonşuda varsa, ya da hər hansı tanış təzə avadanlıq alırsa həmin insanlar da lazım oldu-olmadı bahalı telefonlara, bahalı ev əşyalarına sahib olmaq üçün, "qonşudan qalma dala" prinsipini rəhbər tutaraq addımlar atırlar. Ciddi ehtiyac olmadan belə, kreditə müraciət edirlər. Bu isə sonradan onların aldıqları kreditlərin qaytarılmasında ciddi problemlər yaradır. Bu məsələnin psixoloji tərəfidir. İqtisadi səbəbi isə ondan ibarətdir ki, rəsmi məlumatlara görə, Azərbaycanda olan normal əmək haqqı 500 ABŞ dolları civarındadır. Bu, o qədər də yüksək məbləğ deyil. Yeni evlənənlər, gənc ailələr, büdcə təşkilatlarında çalışanlar özlərinə ev əşyası almaq üçün çətinlik çəkirlər. Ona görə də, istehlak kreditlərinə yönəlirlər. İstehlak kreditlərinin də faizləri Azərbaycanda çox yüksək olduğundan, sonradan onun qaytarılmasında problemlər yaranır. Bu isə bank sektorunda ciddi təhdid yaradır və gələcəkdə mənfi təsir göstərə bilər". 

Azərbaycan Kredit İttifaqları Assosiasiyasının İdarə heyətinin sədri Ayaz Quliyev isə Movqe.az-a  müsahibəsində istehlak kreditlərinin iqtisadiyyata daha çox müsbət təsirinin müşahidə olunduğunu bildirib: "İnsanlar istehlak kreditinə o vaxt müraciət edirlər ki, hansısa bir məhsulu almağa imkanları çatmır və ya nağd ödəniş etmək istəmirlər. Ona görə banklar bu gün istehlakçılara geniş kredit imkanları yaradırlar. Banklar istehlak kreditləri ilə əhalinin əksəriyyətini özünə cəlb edirlər. Bəlkə də insanlar məhsulu nağd şəkildə alsalar daha yaxşı olar.  Amma, bu yol insanlara daha əlverişlidir. Düşünürəm ki, istehlak kreditlərinin iqtisadiyyata mənfi təsirindən çox müsbət təsiri var. Hər halda kredit maaliyyə məhsuludur. İnsanlar arasında daha çox yayılır və geniş şəkildə istifadə olunur. Bu səbəbdən istehlak kreditlərinin reytinqi gündən-günə artır".