Əlaqə Arxiv
news Image
2013.11.20
16:40
| A A A
Brend malların qiyməti aşağı düşəcək
Məhəmməd Talıblı: «Brendlərin ölkəyə daxil olması ümumilikdə, ölkənin reytinq göstəricilərininin artmasını da təmin edir» Ruslan Atakişiyev: «Zaman keçdikcə, belə mağazaların sayı artdıqca, brend malların qiymətlərində də müəyyən dəyişikliklər olacaq»

Məlumat verildiyi kimi, Nazirlər Kabineti gömrüksüz ticarət mağazalarının ("duty free") yaradılması və fəaliyyətinin tənzimlənməsi qaydalarını təsdiq edib. Gömrüksüz mağazalar ticarəti beynəlxalq aeroportlarda, beynəlxalq dəniz limanlarında, sərhəd-keçid məntəqələrindəki gömrük nəzarət zonalarında yaradıla bilər. Bu tipli mağazalarda satılan məhsullara görə, dövlət hərhansı bir rüsum, vergi tələb etmir. Və "duty free"lərdə satılan məhsullar, əsasən brend markaların məhsulları olur. Azərbaycanda belə mağazaların açılmasında məqsəd və iqtisadi cəhətdən gözlənilən üstünlüklər haqda araşdırma apardıq. İqtisadçı-ekspertlərə görə, haqqında sözügedən mağazaların fəaliyyəti Azərbaycan iqtisadiyyatına müsbət təsir edəcək.

İqtisadçı-ekspert Məhəmməd Talıblı Movqe.az-a açıqlamasında "duty-free" mağazalarının açılmasını dövlətin himayədarləq siyasəti adlandırdı: "Əslində, bu, dövlətin dolayı yolla etdiyi himayədarlıq siyasətidir. Məqsəd ümumiyyətlə, xarici investorların ölkəyə cəlb olunmasıdır. Və xarici investorların cəlb olunması da, həmin o investorların mal və xidmətlərinin ölkə daxilinə, ümumiyyətlə, ölkə iqtisadiyyatına daxil olması üçün nəzərdə tutulur. Adətən, dövlətlər bəzən azad ticarət zonası yaradırlar. Azad ticarət zonasında istehsal olunan mal və xidmətlərə görə , ümumiyyətlə, dövlət heç bir vergi almır. Əslində, bu da ona bənzər metodlardan biridir. Bu vəziyyət ondan xəbər verir ki, xarici investorların ölkəyə gəlməsi daha əsas götürülür. Həmin investorlar ölkəyə gələn zaman, təbii ki, həmin malların ölkədə rəqabət imkanları da yaranır. Eyni zamanda buna bənzər məhsulların da istehsalının stimullaşdırılmasına gətirib çıxara bilər. Ona görə də, belə xidmətlərin təklif olunması əlavə olaraq ölkədə yeni istehsal müəssisələrinin yaradılmasına gətirib çıxara bilər. Eyni zamanda, bəzi şirkətlərə tətbiq olunan bu xidmətlər çox arzuolunan şəkildə yerli sahibkarlıq subyektləri üçün də tətbiq oluna bilər. Belə olan təqdirdə də, həmin yerli sahibkarların gəlirlərinin bir qismi gərək vergi formasında dövlət büdcəsinə daxil olsun. Bu, əslində, eksklüziv və lüks mallarla bağlı olur. Daha çox marka olan eksklüziv məhsulların satışı zamanı nəzərə alınır. Bu xidmətlərin yaradılmasında məqsəd mal satışı ilə həmin ölkə iqtisadiyyatının zənginləşməsi deyil, məhz həmin brendlərin ölkəyə daxil olmasıdır. Belə brendlərin ölkəyə daxil olması ümumilikdə, ölkənin reytinq göstəricilərininin artmasını da təmin edir. Ona görə də, daha çox bu cəhətlər əsas götürülür və həmin brendlərin ölkəyə daxil olması üçün belə bir asan yoldan istifadə olunur. Sahibkarlara şanslar verilir". 


İqtisadçı-ekspert Ruslan Atakişiyev isə, saytımıza verdiyi açıqlamada belə mağazaların sayı artdıqca məhsulların qiymətində də ucuzlaşma müşahidə oluna biləcəyini bildirdi: "Bu təcrübə bir sıra qərb ölkələrində tətbiq olunub. Ümumiyyətlə, dünya ölkələri daxildə istehsal olunan məhsulun daha çox xaricə ixrac olunması, xarici turistlərin ölkədən daha çox mal alması baxımından bu kimi təcrübələr həyata keçirirlər. Məsələn, bəzən ölkələrdə "tax-free" sistemi tətbiq olunur ki,  buna əsasən, ölkə daxilində məhsul alan zaman xarici vətəndaşa verilən sənəd əsasında, o, öz ölkəsinə qayıdarkən elə hava limanında və ya gömrükdə aldığı məhsulun əlavə dəyər vergisi müəyyən dərəcədə həmin alıcıya qaytarılır. Və yaxud da, bu kimi bir sıra stimullaşdırıcı üsullardan istifadə edirlər. Bunu o məqsədlə edirlər ki, müştərilər belə məhsulları daha çox alsınlar.

"Duty free" mağazaların açılması da ölkə daxilində daha çox məhsulun satılmasına gətirib çıxaracaq. Bu, ticarətin inkişafına birbaşa olaraq təsir göstərəcək. Zaman keçdikcə, belə mağazaların sayı artdıqca, burada satılan brend malların qiymətlərində də müəyyən dəyişikliklər olacaq". 



Sizin Reklam Yeriniz