İnsanların bir çox xidmətlərdən internet vasitəsilə yararlana bildikləri bir dövrdə, artıq elektron alqı-satqı Azərbaycanda daşınmaz əmlak sahəsində də aparılır. Belə ki, artıq insanlar evlərindən kənara çıxmadan, rieltorlara müraciət etmədən də, istədikləri ərazilərdəki evlər haqda məlumat ala, eyni zamanda onu əldə edə bilirlər. Bununla bərabər, özlərinin satmaq istədikləri əmlaklarını da internet üzərindən satışa çıxara və rahat şəkildə müştəri tapa bilirlər. Bundan başqa dünyada ilk dəfə olaraq Azərbaycanda daşınmaz əmlakı elektron ticarəti tətbiq olunub. Bunun vasitəsilə mülkiyyət hüququnun elektron formada təsdiq edilməsi də mmükün olacaq.  

Daşınmaz əmlak ticarətinin onlayn şəkildə həyata keçirilməsinin üstünlüklərindən danışan iqtisadçı-ekspert Vüqar Bayramov bu xidmətin Azərbaycanda hələ ki, zəif aparıldığını deyir: "Onlayn alış-satış artıq bir sıra MDB ölkələrində təqdim olunan bir xidmətdir. Burda həm ayrı-ayrı  şəxlərin daşınmaz əmlakının, həm də eyni zamanda, dövlət əmlakının onlayn alqı-satqısının aparılması nəzərdə tutulur. Lakin Azərbaycanda hələlik daşınmaz əmlakın onlayn alqı-satqısı zəif tətbiq olunur. Daşınmaz əmlakla bağlı onlayn sistem, yəni, daşınmaz əmlakın satışı ilə bağlı məlumatların verilməsi və bundan sonra isə artıq rəsmi olaraq, notariusda təsdiq olunaraq bank vasitəsilə alqı-satqının həyata keçirilməsi bir o qədər geniş şəkildə baş vermir. O baxımdan, əslində daşınmaz əmlakın onlayn alqı-satqısının genişləndirilməsinə ehtiyac var. Ona görə ki, bu birmənalı şəkildə, ilk növbədə şəffaflığı artırır. Çünki,  internet vasitəsilə aparıldığı üçün sonradan onun müvafiq qurumlar tərəfindən idarə edilməsi də rahat olur. Eyni zamanda, onlayn alqı-satqı həyata keçirilən zaman əhəmiyyətli məqamlardan biri ödənişlərin də onlayn olmasıdır. Ödənişlərin onlayn olması birmənalı şəkildə imkan verir ki, ödəmə düzgün aparılsın. O cümlədən, onlayn alqı-satqı birbaşa olaraq vaxta qənaət deməkdir. Bütün bunlarla bərabər onlayn alqı-satqı alıcı qarşısında geniş seçim imkanı qoyur. Bu, əmlak bazarında alqı-satqıların çoxalmasına da gətirib çıxarır. Çünki onlayn alqı-satqı onlayn ödəmə sisteminin tətbiq olunması deməkdir ki, bu da bütövlükdə daşınmaz əmlak bazarında aktivliyin yüksəlməsinə səbəb olur. O baxımdan, onlayn alqı-satqı birmənalı şəkildə bazarda canlanma, prosedurların tez və rahat həyata keçirilməsi və eyni zamanda şəffaflığın artırılması baxımdan kifayət qədər ciddi əhəmiyyətə malikdir". 

"Əmlak Bazarı İştirakçıları" İctimai Birliyinin eksperti Rövşən Talıbzadə də, onlayn alqı-satqını müsbət hal kimi qiymətləndirərərk, daşınmaz əmlak bazarında təkamülə səbəb olduğunu bildirir: "Bü gün  ölkə Prezidentinin fərmanına uyğun olaraq, artıq bütün dövlət qurumları elektorn qeydiyyat sistemində fəaliyyət göstərirlər. Bunlar elektron hökümət layihəsinə əsasən həyata keçirilir. Biz bu gün Avropaya inteqrasiya edirik. Ölkəmizin həm iqtisadi cəhətdən, həm texnoloji cəhətdən inkişafı sürətlənməkdədir. Belə bir əsrdə, belə bir dövrdə, təbii ki, alqı-satqının pərakəndə maklerlərin fəaliyyəti ilə edilməsi doğurdan da bizi artıq köhnə dövrlərə aparır. Bu baxımdan, onlayn alqı-satqı sisteminin olması bazarda müasir tələblərə cavab verir. Artıq hər bir kəs istədiyi zaman evdə oturub daşınmaz əmlak bazarında satılan evlərlə tanış ola bilir. Öz təklifi olanda onu asan şəkildə internet saytlarına yerləşdirə bilir. Bu, əlbəttə, vətəndaşların rahatlığı üçündür. Onlayn alqı-satqı həm də şəffaflığı təmin edir. Vətəndaş təklifini elektron sistemə yerləşdirəndə ona tez bir zamanda alıcı da tapa bilir. Heç bir vasitəçisiz, rieltorsuz bu alqı-satqını həyata keçirmək mümkün olur ki, bu da əlavə yaranan xərclərin qarşısını alır. Normalda hallarda bəzi rieltorlar qiymətlə bağlı alqı-satqı zamanı neqativ hallara yol aça bilirlər ki, onlayn ticarət bunun qarşısını alır. Müştəri satıcı ilə birbaşa əlaqədə olur. Özləri də öz alqı-satqılarını istədikləri kimi həyata keçirirlər. Onlayn ticarət, əlbəttə ki, bu gün daşınmaz əmlak bazarı üçün zərurətdir. Ehtiyacdan yaranan bir şeydir və bazarın inkişafı üçün təkamüldür".