Son günlərdə, əsas diqqət cəlb edən məsələlərdən biri də mənzillər üçün kreditlərin dayandırılmasıdır. Bu fonda maraqlıdır ki, mənzillərin qiyməti daha da artır.    Ekspertlər isə bunun səbəblərini fərqli prizmadan izah edirlər. 

Bu sahədəki qiymət artımının kredit siyasəti ilə deyil, yeni tikinti dalğasının başlaması ilə əlaqəli olduğunu düşünən iqtisadçı ekspert Məhəmməd Talıblı təkrar mənzillərin qiymətində də artım müşahidə olunacağını dedi: "Düşünürəm ki, mənzillərin qiymətinin qalxması heç də bankların kredit siyasəti ilə bağlı deyil. Bu, daha çox ölkədə müşahidə olunan yeni tikinti dalğası ilə bağlıdır. Yeni tikinti dalğası xüsusilə də "Sovetski" deyilən ərazini əhatə edir. Ümumiyyətlə, hal-hazırda Bakı ətrafında da sürətli söküntü işlərinə başlanıbdır. Ona görə də, bu, daha çox özünü həmin o yeni tikiləcək mənzillərdə göstərir. Vətəndaşlar sökülən evləri üçün kompensasiya alacaqlarına görə, yeni mənzillərə tələbat artacaq. Bu halda bazardakı təkrar mənzillərin də qiymətində artım müşahidə olunacaq.  Əslində, bunu bir qədər də psixoloji amillərlə bağlamaq olar. Çünki bilirsiniz ki, hələ "Sovetski" deyilən ərazilərdə və başqa ərazilərdə kompensasiyaların tam verilməsi başa çatmayıb, prosesin ilkin mərhələsidir. Hələ vətəndaşların əlinə  kompensasiya pulu çatmamış ona uyğun olaraq bazarda tikinti materiallarının qiymətlərinə start veilibdir. Yaxın müddətdə psixoloji qiymət həddi bir az da yüksələ bilər. Ona görə də, tikinti marteriallarına tələbat da artacaq. Bu səbəbdən də qiymətlər artıb".

"MBA LTD" şirkətinin rəhbəri Nüsrət İbrahimov tikinti sahəsindəki qiymət artımının bazar qiymətlərinə uyğun olduğunu düşünür: "Tikinti şirkətləri qiymətləri bazara uyğun olaraq artırırlar. Bazarda ümumi qiymətlər artdığından, mənzillərin də qiyməti artır. Mərkəzi Bank ona görə kredit siyasətini sərtləşdirir ki, pul-kredit sistemi stabil qalsın. Çünki, bildiyiniz kimi, Mərkəzi Bank bu sahəyə diqqət  yetirir ki, qiymətlər stabil qalsın, inflyasiya aşağı səviyyədə olsun, manatın məzənnəsi stabil olsun və s. Ona görə də, siyasəti bu istiqamətdə yönəldir. Mərkəzi Bank bazardakı vəziyyəti izləyir və görür ki, daşınmaz əmlak sahəsində qiymətlər həddən artıq qalxıb. Ona görə də bu sahədə siyasətini sərtləşdirir".