Son vaxtlar paytaxtda aparılan söküntü və yenidənqurma işləri artıq məlumat verildiy kimi daşınmaz əmlak bazarında qiymət artımına səbəb olub. Prosesin hələ müəyyən müddət davam edəcəyi və qiymətlərin  bunan sonra da yüksələcəyinə dair çoxsaylı proqnozlar verilməkdədir. Məlumdur ki, "Sovetski" adlanan ərazidəki yaşayış evlərinin sökülməsindən sonra, 2030-cu ilə kimi "Xutor" və "Papanin" adlandırılan ərazilərin sökülməsi də nəzərdə tutulur. Bu söküntü işləri ilə əlaqədar insanların mənzilə olan tələbatı təbii olaraq artır. Ən çox tələbat da ekonom klass evlərə olduğundan, bazarda hal-hazırda belə evlərin qıtlığı yaşanır. Yəni, əhali ekonom klass evlərlə təmin oluna bilmir. Bəs bu fonda elit evlərə tələbat arta bilərmi?

"Əmlak Bazarı İştirakçıları" İctimai Birliyinin eksperti Rövşən Talıbzadə elit evlərə tələbatın artmasının gözlənmədiyini, lakin ekonom klass evlərin qiymətində bahalaşma müşahidə olunacağını düşünür: "Ümumiyyətlə, qeyd etmək istərdim ki, Bakı şəhərində tikilmiş evlərin təsnifatını aparmaq bir o qədər də doğru olmazdı. Adətən Avropada müəyyən standartlara uyğun olaraq, evlər ekonom klass, elit evlər deyə siniflərə ayrılır. Bizdə isə bu bölgü mənzilin qiymətinə əsasən aparılır. Belə ki, bizdə sahəsi kvadratmetrə görə 600-700 manat arası olan evlər ekonom klass, 3000-4000 manata olan evlər isə elit hesab olunur. Əslində, bizdə bu bölgülər üçün standartlara cavab verən evlər yoxdur. Hal-hazırda məsələ ondan ibarətdir ki, qiyməti 600-700 manata olan evlərə daha böyük tələbat yarandığından bu sahədə qıtlıq yaranıb. Lakin bu o demək deyil ki, burda qıtlıq yaranıb deyə, insanlar qiyməti bundan qat-qat baha olan evlərə üz tutacaqlar. Sadəcə, düşünürəm ki, kvadratmetri 600-700 manata olan ekonom klass evlərin qiymətlərində artım müşahidə olunacaq". 

 "MBA LTD" şirkətinin rəhbəri Nüsrət İbrahimov da elit evlərə tələbatın artacağını proqnozlaşdırmır: "Elit evlərə tələbatın artmasını qətiyyən gözləmirəm. Kvadrat metri 3000-4000 manata olan elit evlərin qarşılığında ekonom klass evlərin dəyəri kvadratmetrə görə 600-700 manat dəyərindədir. Yəni, bunların arasında qiymətcə 5-6 dəfə fərq var. Bu seqmentin öz alıcıları, digərinin öz alıcıları var. Amma qətiyyən burda qıtlıq var deyə, elit evlərə tələbin artacağını gözləmirəm. Belə bir ehtimal gözlənilmir".