Açıqlanan rəsmi məlumatlara görə, 2010-cu ildə kirayədə qalan insanların sayı ümumi əhalinin 1.6%-ni təşkil edirdisə, 2013-cü ildə bu göstərici azalaraq 1.1% təşkil edib. Nəzərə alanda ki, son 3 ildə yeni tikilən evlərin sayında da azalma müşahidə olunub, bu fonda kirayə bazarında passivlik müşahidə olunması maraq doğurur. Lakin ekspertlər hesab edirlər ki, əslində, bu gün kirayə bazarında azalma yox, əksinə artım müşahidə olunmaqdadır.
Əmlak Bazarı İştirakçıları İctimai
Birliyinin üzvü Rövşən Talıbzadə deyir: "Bizim apardığımız
araşdırmalara görə, bu gün kirayə bazarında heç də azalmalar
müşahidə olunmur. Əksinə, ötən illərlə müqayisədə artım müşahidə
edilib. Əslində, kirayə bazarında artım və azalmalar mövsümlə
əlaqəli olaraq dəyişir. Məsələn, avqust, sentyabr, oktyabr
aylarında universitetlərin açılması ilə əlaqədar rayonlardan
tələbələr şəhərə axın edirlər. Eyni zamanda paytaxta üz tutananlar
arasında işləmək üçün gələnlər də olur. Bu gün şəhərdə
irimiqyaslı layihələr həyata keçirilir. Bununla əlaqədar işçilərə
ehtiyac yarandığından regionlardan insanlar bura üz
tuturlar.
Ona görə də 2010-cu illə müqayisədə, demək olmaz ki, kirayə bazarında azalma müşahidə edilib. 2010-cu il daşınmaz əmlak bazarında stabillik dövrü kimi müşahidə olunmuşdu. 2011-2012-ci illərdə də daşınmaz əmlak bazarında həm qiymət qrafikasında, həm də aktivliyi ilə bağlı həmişə stabillik müşahidə etmişdik. Amma 2013-cü ildən bazarda aktivlik müşahidə edilir. Kirayə qalanların sayında da, evlərin qiymətində də artım müşahidə olunubdur. Və bu artım daha çox mövsümi aylarda müşahidə olunub. Ola bilər ki, hansısa dövr üçün, məsələn, yay aylarında tələbələrin, eyni zamanda işçilərin məzuniyyətə, tətilə çıxaraq öz evlərinə qayıtması ilə bağlı kirayə bazarında passivlik hökm sürür. O da ola bilər ki, hansısa ilin yay aylarında digər ilə nisbətən azalma müşahidə olunsun. Amma ümumi tendensiyada kirayə qalanların sayı ilbəil artır. Bu da onunla əlaqədardır ki, həm təhsillə bağlı gələnlər çoxalır, həm də ki, işlə əlaqəli üz tutanlar artır.
Ona görə, hesab etmirəm ki, kirayə bazarında bu gün azalma var. Bunu yalnız o zaman söyləmək olar ki, iqtisadiyyatda durğunluq olsun. Belə bir durğunluq isə yoxdur. İndiki vəziyyət üçün bu xarakterik deyil. Buna görə də, kirayə bazarında aktivlik hökm sürməkdədir".
"MBA LTD" şirkətinin rəhbəri Nüsrət
İbrahimli də bildirdi ki, indiki şəraitdə kirayə bazarında hər
hansı bir azalma müşahidə olunmur: "Deməzdim ki, bu gün kirayə
evlərin sayında azalma müşahidə olunur. Amma ümumən azalma olubsa
da, bu müəyyən aylar üçün xarakterik ola bilər. Əsasən işgüzarlıq
indeksi aşağı düşəndə bu baş verir. Çünki kirayə qalan insanların
əksəriyyəti işləmək üçün Bakıya gələnlər, tələbələr və yaxud da ki,
yaşayış yerinin dəyişənlər olur. Əgər kirayə ev götürənlərin sayı
azalıbsa, demək ki, işgüzarlıq indeksi aşağı düşüb. İkincisi isə
səbəb o ola bilər ki, hamı öz mənzil problemini həll edib və kirayə
yaşayanların indeksi aşağı düşüb.
Amma dediyim kimi, biz hər hansı bir azalma müşahidə etmirik. Ona görə ki, son zamanlar bir sıra evlərin sökülməsi ilə bağlı insanların əksəriyyəti kirayə mənzillərə üz tuturlar. Digər tərəfdən işgüzarlıq indeksi artır, miqrasiya çoxalır və s. Bütün bu səbəblərə görə, mən hesab etmirəm ki, kirayə götürülən evlərin sayı azalıb".
