Artıq bütün dünyada smartfonlar texnologiya bazarını ələ keçirməkdədir.  "eMarketer" analitik şirkətinin araşdırmalarına görə, 2014-cü ilin sonunadək smartfon istifadəçilərinin sayı ötən illə müqayisədə 25 faiz artaraq təxminən 1,76 milyarda çatacaq. 2017-ci ilədək artıq dünyada yaşayan insanların 33 faizi smartfonlardan istifadə edəcəkdir. Başqa bir tədqiqata görə, smartfonlar yaxın beş ildə kompüter qurğularının ən sürətlə artan növü olmaqla, 2018-ci ildə payı 74,1 faizə çatacaq. Belə proqnozlaşdırılır ki, dünyada smartfonlar masaüstü və mobil kompüterlərdən altı dəfə çox satılacaq. 

Hazırda smartfon istifadəçilərinin sayına görə Çin dünyada birinci yerdədir. Ölkəmizdə də smartfonlara tələbat kifayət qədər yüksəkdir. Lakin bizə bu məhsullar bir qayda olaraq xaricdən gətirilir. Təklif olunur ki, smartfon istehsalı Azərbaycanda da həyata keçirilsin. Qeyd edək ki, artıq ölkəmizdə planşet istehsal edilir. O zaman smartfonlar üzərində də bu təcrübənin aparılması mümkün sayılır. Smartfonların yerli istehsalı onların Azərbaycan alıcısına da daha ucuz başa gəlməsinə gətirib çıxaracaq. 

İqtisadçı-ekspert  Natiq Cəfərli bununla bağlı Mövqe.az saytına fikirlərini açıqlayıb. Ekspert deyir ki, bu, rəqabət yükü çox ağır olan sahədir. Əgər Azərbaycan belə bir istehsala başlayarsa, bu məhsullar dünyada olan "Samsung", "Apple", "Nokia" kimi analoqları ilə rəqabətə davam gətirə biləcək məhsullar olmalıdır:  "Ən azından keyfiyyətdə onlara yaxın  smartfonlar olmalıdır ki, alıcılar tərəfindən müsbət qarşılansın. Həm də qiymət məsələsi də vacibdir. Əgər Azərbaycan bazara dünyada olan analoqları ilə eyni olmasa da, ən azından onlara  yaxın keyfiyyətdə modellər çıxarda bilsə, o zaman təbii ki, Azərbaycan istehlakçılarının da gündən-günə artan tələbatının müəyyən hissəsini ödəməyə nail olmaq olar. Amma dediyim kimi, bu çox çətin bir bazarın seqmentidir. Rəqabətlilik həddindən artıq yüksəkdir. Bir neçə iri şirkət var ki, dünyada bazarı öz aralarında bölüblər. Və onlar arasında kəskin rəqabət gedir. Bu, elə bir sahədir ki, tez-tez model yenilənməsi olmalıdır. Bunun üçün isə elmi baza da olmalıdır. Əgər Azərbaycan Çindən hər hansı detalları alaraq smartfonların Bakıda istehsalını, yığımını həyata keçirsə və bunun elmi bazası olmasa, getdikcə inkişaf etdirilməsə, bu seqmentdə hər hansı bir uğur qazanmaq çox çətin olacaq. Ona görə də, ən azından bu gündən etibarən elmi baza  yaratmaq lazımdır. Öz yerli proqramçılarmızı, bu sahədə biliyi, bacarığı olan, xaricdə təhsil almış insanları cəlb etməklə dövlət dəstəyi ilə müəyyən bir proqram qəbul etmək olar ki, bu sahəni inkişaf etdirmək mümkün olsun. Bu gün smartfonlara Azərbaycan daxili bazarında kifayət qədər tələbat var. İş yaxşı qurulsa, müəyyən uğur qazanmaq mümkündür".  

İqtisadi və Sosial İnkişaf Mərkəzinin iqtisadi tədqiqatçısı Fərhad Bayramov isə  smartfon bazarındakı rəqabətli mühitə yalnız yüksək keyfiyyətli məhsulların davam gətirə biləcəyini deyir: "Əlbəttə, bu iş heç də asan görünmür. Ona görə ki, bazarda kifayət qədər daha aşağı qiymətlə yüksək keyfiyyətə sahib dünya brendləri iştirak edir. Ancaq bazara rəqabət qabiliyyəti yüksək olan məhsulların çıxarılması imkan verəcəkdir ki, həmin brendlərlə yanaşı, yerli istehsalın nəticəsi olan son məhsullar da ölkənin daxili bazarında reallaşa bilsin. Təklif edərdim ki, smartfonların istehsalı başlandığı zaman kifayət qədər aşağı dərəcəli vergilər və eyni zamanda 0%-li dövlət dəstəkli kreditlər verilsin. Bu imkan verəcəkdir ki, istehsal olunan son məhsulun maya dəyəri nisbətən aşağı olsun və bazarda olan brendlərin qiymətlərinə nisbətən daha ucuz məhsul çıxarılsın". 

Fərhad Bayramov bu sahədə beynəlxalq təcrübədən yararlanmağı, beynəlxalq korporosiyalarla birlikdə fəaliyyət göstərməyi məqsəduyğun sayır: "Digər bir məsələ də, beynəlxalq təcrübənin öyrənilməsidir. Yəni belə istehsal sahələri yaradılarkən yaxşı olardı ki, beynəlxalq korporasiyalarla birlikdə fəaliyyət göstərilsin. Çünki həmin şirkətlər dünya bazarında olan mövcud reallıqları, innovasiya yönümlü istehsalı daha yaxşı bildikləri üçün, bu təcrübə Azərbaycana da faydalı ola bilər. Nəticə etibarı ilə də həmin yerli istehsal bir müddətdən sonra dünya bazarlarına ixrac edilməklə beynəlxalq ticarətdən əldə olunan gəlirlərin artımına səbəb olacaqdır. Birmənalı şəkildə biz iqtisadiyyatımızla bağlı həssas bir dövrə keçirik. Yəni, ölkə iqtisadiyyatının neft gəlirləri olmadan hansı strategiya ilə inkişaf etdiriləcəyi sualı hər zaman aktiv olaraq qalmalıdır".