Son vaxtlar Rusiyanın yeritdiyi məlum siyasətlə əlaqədar Azərbaycandan bu ölkəyə kənd təsərrüfatı məhsullarının xüsusi axını müşahidə olunmaqdadır. Artıq Rusiya bildirib ki, Azərbaycanda kənd təsərrüfatı məhsullarından əlavə, ət məhsulları, konservlər də almaqda maraqlıdır. Bu, getdikcə iki ölkə arasında ticarət dövriyyəsinin artmasına da rəvac verir.  Şimal qonşumuz ölkəmizdən daha çox məhsul almaqda da maraqlıdır. Rusiya İctimai palatasının beynəlxalq komissiyasının sədrinin müavini Serqey Markov bu fonda  iki ölkə arasında münasibətlərin genişlənməsində maraqlı tərəf olduqlarına bəyan edir. O bildirir ki, Rusiya Azərbaycandan kənd təsərrüfatı məhsullarının idxalını 80 faiz artıra bilər.  Onun sözlərinə görə, bu mərhələdə Rusiya bazarlarına Azərbaycan kənd təsərrüfatı məhsullarının giriş infrastrukturunun yaradılması haqqında müzakirələr aparılmalıdır. Markov ehtiyac olduğu halda topdan satış çatdırmalarının və onların təminatı üçün Rusiyada Azərbaycan loqistik mərkəzlərinin yaradılmasının lazım olduğunu bildirib: "Avropa Birliyi ölkələrinin kobud səhvləri ona gətirib çıxaracaq ki, azad olmuş sektorlar başqa istehsalçılar tərəfindən ələ keçiriləcək. Bu isə AB ölkələri üçün çıxılmaz vəziyyət yaradacaq".

Aydındır ki, Rusiyaya ixracın bel əsürətlə artması qeyri-neft sektorunda yaşanan inkişafı bir qədər də sürətli hala gətirir. 

İqtisadi Resursların Öyrənilməsi Mərkəzi İctimai Birliyinin sədri Ruslan Atakişiyev Movqe.az-a açıqlamasında bildirib ki, hazırkı situasiyada ölkədə yeni müəssisələr yaradıla, işsizliyin aradan qaldırıması istiqamətində müsbət nəticələr əldə edilə bilər: "Son dövrlər Avropa sanksiyaları fonunda Rusiyanın Azərbaycan qida məhsullarına ehtiyacının yaranması Azərbaycan üçün Rusiya bazarına geniş çıxış imkanları verdi.  Azərbaycan iqtisadiyyatının əsas istiqamətlərindən biri ölkənin ixrac qabiliyyətini artırmaq, ixrac yönümlü məhsulların istehsalını daha da genişləndirmək, idxalı əvəz edən məhsulları daha da artırmaqdır.  Bu çərçivədə Azərbaycan üçün əsas hədəflərdən biri Rusiya və MDB ölkələri bazarıdır. İlkin dövrdə Rusiya bazarına çıxışın genişlənməsi səbəbindən bugünkü istehsal tələbatı tam ödəyə bilmədi.  Nəticədə daxili bazarda istehsal olunan məhsulların yerli bazara yönəlməsində qiymət artımı müşahidə olundu. Amma hesab edirəm ki, Rusiya bazarına çıxışın yaratdığı perspektivlər uzun müddət davam edərsə, əlaqələr daha da genişlənər,  Azərbaycandan məhsullar davamlı şəkildə Rusiya bazarına gedərsə, ölkədə ixracyönümlü məhsulların istehsalı genişlənər. Bu da sahibkarlar üçün yeni investisiyalar qoymaq imkanlarının artmasına gətirib çıxaracaqdır. Bu, birbaşa olaraq Azərbaycanda işsizliyin aradan qalxması üçün də imkanlar yaradacaq. Regionlarda yeni-yeni istehsal müəssisələrinin açılması baxımından yeni imkanlar yaranacaq ki, bu da iqtisadi inkişaf baxımından xüsusi əhəmiyyət daşıyır. Bütün bunlar qeyri-neft sektorunun inkişafı üçün imkanlar yaradır". 

İqtisadçı Rusiyaya ixrac tələbatının artması ilə bağlı məhsulların istehsalının genişlənməsinin yerli bazar qiymətlərinə də təsir edəcəyini düşünür: "Onu da qeyd etmək lazımdır ki, Rusiyaya ixrac olunan məhsullara tələbatın artması ilə bağlı istehsal yeni subyektlərinin yaradılması və yaxud da mövcud olanların genişləndirilməsi nəticəsində artıq həm ixraca geniş imkan yaranacaq, həm də daxili bazar tam çeşidlə təmin olunacaq.  Nəticədə yerli bazarda qiymətlərin də sabitləşdiyini görəcəyik". 

İqtisadçı alim Əli Əlirzayev də məsələyə eyni prizmadan yanaşır. İqtisadçı bildirir ki, kənd təsərrüfatı məhsullarının istehsal həcminin artımı ümumi daxili məhsulu artıracaq: "Bu zaman iqtisadiyyatın şaxələnməsi prosesi daha sürətlə gedəcək, ölkənin neft sektorundan asılılığı azalacaq".