Kənd Təsərrüfatı Nazirliyi yeni potensial "Ətlik-südlük istiqamətli fermer təsərrüfatlarının yaradılması" adlı pilot layihə hazırlayıb. Təsərrüfatlar ailə çərçivəsində olacaq. Yəni, söhbət böyük təsərrüfata malik bir neçə ailə birliyindən gedir. Qeyd edək ki, sözügedən təsərrüfatlara Sahibkarlığa Kömək Milli Fondu tərəfindən dəstək də nəzərdə tutulur. Artıq Bərdə, İmişli və Ağcabədi rayonlarında ətlik və südlük ailə pilot təsərrüfatları yaradılıb. Bu isə qeyd olunan istiqamətlərdə daha çox məhsul istehsalına imkan verir.

Kənd təsərrüfatı Nazirliyinin sabiq şöbə müdiri Çingiz Fərəcov respublikada ətlik, südlük təsərrüfatlarının yaradılmasını çox vacib hesab edir: "Çünki, bu sahədə bizdə müsbət təcrübə var. Ancaq hər bir təsərrüfat ixtisalaşmalıdır. Südlük-maldarlıq və ətlik-maldarlıq təsərrüfatı olmalıdır. Kombinə edilmiş şəkildə hazırlamaq onun idarə olunması üçün çətindir. Respublikamızda yaxşı nümunələr var. İmişli rayonunda İsmi Atakişiyevin, Yevlax rayonunda Qabil Məmmədovun camışçılıq, Neftçala rayonunda Əlibala Səlimovun rəhbərlik etdiyi "Vüsal" südlük-maldarlıq, Hacıqabul rayonunda Qabil Abdullayevin südlük-maldarlıq, Abşeron rayonunun Yeni Saray kəndində Elçin İbrahimovun südlük-maldarlıq, həmiçinin, Samuxda Mübariz Hüseynovun südlük-maldarlıq təsərrüfatları nümunəvi təsərrüfatlardır. Bu təsərrüfatlarının yaradılmasında ailə-kəndli, ev təsərrüfatlarında ən çox 5-10 baş heyvan olur. Amma pilot südlük-maldarlıq üzrə təsərrüfatda isə ən azı 150 başa qədər inək olacaq. Bu təsərrüfatlarda yüksək süd məhsuldarlığına malik olan inəklər saxlanacaq". Mütəxəssisin sözlərinə görö, respublikada xüsusi ilə ətlik-maldarlıq təsərrüfatlarının yaradılması ön plana çəkilməlidir: "Bizdə Ağcəbədi kəndinin Qaravəlli kəndində Rəhim Quliyev ancaq ətliklə məşğul olur. Onun təsərrüfatında il ərzində 500 baş mal 400 kiloqrama qədər kökəldilir. O, bazarlara ildə 170 tona qədər diri çəkidə ət göndərir. Ancaq ətliklə südlüyün bir yerdə olması özünü doğrultmur. Bu, dünyada qəbul edilməyən formadır. Vaxtı ilə Abşeron rayonu Bakını təzə südlə təmin etmək üçün yaradılmışdı. Ona görə də Abşeron rayonunda südlük təsərrüfatlarının yaradılması özünü doğruldur. Bu təsərrüfatlar ixtisaslaşanda həm də yemə qənaət edilmiş olacaq. Çünki, onların hər birinə ayrı tərkibdə yem verilir. Bütövlükdə bu təsərrüfatların yaradılması ölkədə maldarlığın inkişafına intensiv töhfə verəcək".

Aqrar məsələlər üzrə digər mütəxəssis Vahid Məhərrəmov bildirdi ki, Azərbaycanın spesifik ölkə olması nəzərə alınmalıdır: "Azərbaycan Rusiya, ABŞ, Kanada, Braziliya deyil ki, geniş otlaq, örüş sahələri olsun. Bizdə əkin, örüş, biçin sahələri məhduddur. Bunlar nəzərə alınıb, model hazırlanmalıdır. Azərbaycanda südlük, ətlik istiqamətində cins malların azlığında problem yoxdur. Bizdə hətta 70%-dən çox cins heyvanlar var. Əsas problem yemçiliklə bağlıdır. Biz bu sahəni ekstensiv yox, intensiv yolla inkişaf etdirməyə çalışmalıyıq. Fermerlərimizin əksəriyyətinin bilgisi yoxdur. Hətta heyvanlar üçün rasion hazırlamaqda çətinlik çəkirlər. Lazımi nəticəni əldə etmək üçün hansı yemdən nə qədər istifadə edilməsini belə bilmirlər. Azərbaycanda heyvandarlığı inkişaf etdirmək üçün ilk növbədə yemçilik inkişaf etdirilməlidir. Kifayət qədər yem ehtiyatı olmadan heyvandarlıqda nəyəsə nail olmaq mümkün deyil. Heyvanın funksiyasi qidanı məhsula çevirməkdən ibarətdir. Yəni, o qidalanmalıdır ki, ət artımı, süd olsun. Ancaq bu gün mövcud olan yem ehtiyatı yalnız onların fiziki durumunu təmin edəcək qədərdir. Yəni, bu işə kompleks yanaşmaq lazımdır. Əlaqəli sahələrdən biri inkişaf etdirilmirsə, digəri də inkişaf etməyəcək. Xüsusən bitkiçiliyi inkişaf etdirmədən heyvandarlığı inkişaf etdirmək mümkün olmayacaq".