Aparılan hesablamalar göstərir ki, bu ilin 9 ayı ərzində ölkəmizdə şəkər çuğundurunun istehsalı 50%-ə qədər azalıb. Belə fikirlər səslənir ki, bu, şəkər məhsullarının istehsalına təsirsiz ötüşməyəcək və hətta qiymət bahalaşmasına yol aça bilər.
Kənd Təsərrüfatı Nazirliyinin
Bitkiçilik məhsullarının istehsalı, emalı və ərzaq ehtiyatlarının
dövlət tənzimlənməsi şöbəsinin müdiri Sabir Vəliyev məsələ ilə
bağlı Mövqe.Az saytına aşağıdakı açıqlamanı verib: "Qiymətin
bahalaşmasından söhbət gedə bilməz. Xammalın xaricdən gətirilməsi
və yaxud daxili bazardan əldə edilməsi şəkərin qiymətində
dəyişikliyə səbəb ola, istehlak bazarında şəkərin qiymətinə təsir
edə bilməz. İstehlak bazarında şəkərin qiyməti sabit qalacaq.
Neçəyə satılırdısa, elə də satılacaq. Qiymət qalxmayacaq".
Kənd Təsərrüfatı İstehsal Vahidləri Ticarətçiləri
Assosiasiyasının üzvü Nizami Qarayev Mövqe.Az saytına açıqlamasında
aşağıdakıları qeyd edib: "Bu o deməkdir ki, 
Azərbaycanda şəkərin qiymətinin daxili
bazarda qiyməti xaricdəki xammalın qiymətinə bağlı olacaq. Əgər
xaricdə xammalın qiyməti qalxarsa, istər-istəməz daxili bazarda da
şəkərin, şəkər tozunun, şəkər məhsullarının qiymətinin qalxmasına
gətirib çıxarda bilər. Bundan qaçmağın yeganə yolu daxildə şəkər
çuğundurunun istehsalınının artırılması ola bilər. Vaxtı ilə
İmişlidə zavod qurulanda 20 min hektarda şəkər çuğundurunun
əkilməsi nəzərdə tutulurdu. Hal-hazırda bu rəqəm illərdən asılı
olaraq 5-7 min hektar arasında dəyişir. Göründüyü kimi nəzərdə
tutulduğundan xeyli az miqdarda şəkər çuğunduru əkilir. Zavodun
tələbatı daxili xammal hesabına ödənilmir. Yaxşı olardı ki, xüsusi
şərtlər daxilində Azərbaycan fermerləri ilə müqavilə bağlanılsın.
Daha böyük ərazilərdə şəkər çuğunduru əkilsin ki, zavod yerli
xammal ilə təmin olunsun. Belə etməklə daxili bazarda stabil qiymət
əldə etmək mümükün olar."
