Əmlak Məsələləri Dövlət Komitəsi (ƏMDK) tərəfindən dövlət əmlaklarının özəlləşdirilməsi üzrə hərrac davam etdirilir. Sonuncu hərrac zamanı ümumilikdə 35 dövlət əmlakı özəlləşdirilib. Ondan əvvəl isə 16 əmlak özlləşdirilib. Göründüyü kimi dövlət əmlaklarının özəlləşdirilməsi üzrə keçirilən hərraclara maraq artır. İstənilən vətəndaşın, yerli və xarici investorların məhdudiyyətsiz iştirak etdiyi açıq hərracda səhmdar cəmiyyətləri, kiçik dövlət müəssisə və obyektlərin, eləcə də nəqliyyat vasitələrinin satışı baş tutur. Hərraclar rəqabət şəraitində keçdiyindən iştirakçılar da razı qalırlar. İqtisadçıların sözlərinə görə, özəlləşdirmə prosesi ölkə iqtisadiyyatı, xüsusən də sahibkarlığın inkişafı baxımından əhəmiyyətlidir. Bununla büdcə yükünün azaldılması, passiv əmlakların dövriyyəyə cəlb edilməsinə nail olmaq mümkündür.
"Ekonomiks" Beynəlxalq İqtisadi Araşdırmalar Birliyinin sədri,
iqtisad elmləri doktoru, professor Fikrət Yusifovun sözlərinə görə,
dövlət əmlakının hərraclar vasitəsilə özəlləşdirilməsinin ən böyük
üstünlüyü ondan ibarətdir ki, bu zaman əmlakın real bazar dəyərinin
müəyyən edilməsi ilə bağlı neqativ halların baş verməsi mümkün
deyil: “Digər tərəfdən belə özəlləşdirmə əmlakın bazar qiymətləri
əsasında təşkil ediləcəyindən dövlət büdcəsinə daha çox vəsaitlərin
daxil olmasını təmin edəcək. Bu məsələdə “Dövlət əmlakının
özəlləşdirilməsi prosesinin təkmilləşdirilməsi sahəsində əlavə
tədbirlər haqqında” Azərbaycan Respublikası Prezidentinin 19 may
2016-cı il tarixli Fərmanının əhəmiyyəti böyükdür. Fərmana əsasən,
aparılacaq özəlləşmədən ölkənin iqtisadiyyatı üçün gözləntilər
böyükdür. Burada söhbət təkcə özəlləşəcək əmlakın müqabilində
büdcəyə daxil olacaq vəsaitlərin daha yüksək olacağından getmir.
Eyni zamanda özəlləşəcək dövlət əmlakının təyinatı üzrə istifadə
edilməsini nəzərdə tutan addımlar atılacaq. Bir sözlə, özəlləşmənin
bu mərhəlləsində, dövlət maksimum səmərə götürməyi
proqnozlaşdırır”.
Digər iqtisadçı-ekspert Yusif Vəliyev bildirdi ki, ölkəmizdə
illərdi passiv qalan obyektlər var idi: “Hansı ki, onlar heç bir
gəlir gətirmirdi. Artıq hökümət özəlləşdirmə prosesinə start
verməklə həmin obyektlərə “canlanma” gətirmiş olacaq. Bunun üçün
onlayn portallar da yaradılıb. Özəlləşdirmə prosesinin əsas məqsədi
ölkəyə əlavə investisiyanın cəlb olunması və passiv
investisiyaların aktivləşdirilməsidir. Ona görə də bunu birbaşa
iqtisadiyyatın inkişafını təmin edəcək növbəti addımlardan hesab
etmək olar. Özəlləşmə tam olaraq istənilən qaydada reallaşarsa,
iqtisadiyyata böyük faydası dəyəcək. Çünki, passiv obyektlərin
hətta dövlət tərəfindən də aktivləşməsi çətinləşmişdi. İndi isə
həmin əmlaklar “canlandırmaqla” ölkə iqtisadiyyatına yeni valyuta
axını təmin olunacaq”.
Mübariz BAYRAMOV