Oktyabrın 18-i Azərbaycan Respublikası müstəqilliyinin 25-ci
ildönümünü qeyd edib. Bu möhtəşəm tarix münasibətilə təşkil olunmuş
yığıncaqda Prezident İlham Əliyev keçilmiş yolun çətinliklərindən
və uğurlarından danışıb, qazanılmış qələbələrin tarixi
əhəmiyyətinin izahını verib.
Müstəqillik illərinin ən böyük göstəricilərindən biri respublikanın
iqtisadi yüksəlişi ilə bağlıdır. Azərbaycan min ildir ki, öz nefti
ilə məşhurdur. Neft ölkəsi olmasına baxmayaraq, sovet dönəmində
əhalinin sosial vəziyyəti indikindən xeyli aşağı idi. Çünki, gəlir
mərkəzə, Moskvaya çatırdı. Amma indi, necə deyərlər, öz əlimiz öz
başımızdır. Ölkə rəhbərliyi iqtisadiyyatı müstəqil şəkildə idarə
edir, mədaxili-məxarici sərbəst müəyyənləşdirir. Bu səbəbdən də
əsas diqqəti əhalinin sosial-iqtisadi vəziyyətinin, maddi-rifah
halının yaxşılaşdırılmasına yönəldə bilir.
Ötən illər ərzində aparılmış düzgün və davamlı siyasət nəticəsində
Azərbaycan dünyada analoqu olmayan iqtisadi yüksəlişə imza atıb.
İlk növbədə strateji neft və qaz məhsullarının hasilatı və
satışının dövlətin strategiyasına xidmət edən formulu
müəyyənləşdirilib. Bundan alınan siyasi və iqtisadi dividendlər
ölkənin daxili inkişafının simptomlarına çevrilib. Dövlət
başçısının müstəqilliyin üçüncü əsas dövrü adlandırdı 2003-cü ildən
sonrakı dövr iqtisadi quruculuğun görünməmiş sürətlə genişlənməsi
ilə tarixə qovuşub. Keçmişdən miras qalan təsərrüfat subyektlərinin
əksəriyyətinin dağıldığı bir ölkədə qısa zaman kəsiyində yeni
müəssisələr yaratmaq hesabına iqtisadiyyatı üç dəfə artırmaq hələ
heç bir dövlətə nəsib olmayıb. Sənaye istehsalı da o qədər artıb.
Yoxsulluq indeksi ölkədə sürətlə aşağı düşüb, 50 faizdən 5 faizə
enib.
Regionların, şəhər və kəndlərin siması inanılmaz dərəcədə
dəyişilib. Əhalinin məşğulluq dərəcəsi artırılıb. Şəxsi
təsərrüfatların inkişafına, ailə-fermer təsərrüfatlarına hərtərəfli
qayğı göstərilib. Yeni ab-havada istehsal subyektlərinin
yaradılmasına hər cür yardım edilib. Qısa müddətdə 1 milyon 300 min
yeni iş yeri yaradılıb. Bütün bunlar ağıllı və gələcəyə hesablanan
siyasətin önəmli nəticələridir.
13 il ərzində ölkədə 3 mindən çox məktəb, 600-dən çox tibb ocağı,
40-dan çox İdman Olimpiya Mərkəzi tikilib istifadəyə verilib.
Regionun ən böyük stadionu da məhz Azərbaycanda inşa edilib. Bunlar
son illərin nailiyyətləridir.
Görülən işlər sadəcə, gündəlik tələbatı ödəmək məqsədi güdməyib.
Dünyanın ən inkişaf etmiş ölkələri ilə əməkdaşlıq nəticəsində
müasir səviyyəli zavod-fabriklər tikilib. Ölkəyə yeni
texnologiyalar gətirilib. Dövrün tələblərinə cavab verən
müəssisələr yaradılıb.
10 il əvvəl heç kim düşünməzdi ki, Azərbaycan kosmik texnologiyanən
istifadəçisinə çevriləcək. Amma indi bu reallıqdır. Kosmik fəzada
Azərbaycanın iki peyki “işləyir”. Üçüncü peykin buraxılması yaxın
gələcəkdə gözlənilir. Bu, çox böyük müvəffəqiyyətdir. Həm də
Azərbaycanın bu günün və gələcəyin dövləti olmasına maddi
sübutdur.
Cəmi 10 il əvvəl bizim xarici ölkələrin yardımına ehtiyacımız
vardı. Ancaq indi xarici dövlətlərin, hətta yüksək inkişaf etmiş
dövlətlərin Azərbaycan iş birliyində maraqlı olması diqqətəlayiq
hadisədir. Azərbaycan Qərb ölkələrinə neft və qaz ixrac edir və bu
məhsulların həcmini ildən-ilə artırır. Tbilisi-Ceyhan neft,
Bakı-Tbilisi-Ərzurum qaz kəmərləri əsasında yaradılmış “Cənub” qaz
dəhlizi, inşası uğurla davam etdirilən TAP, TANAP qaz kəmərləri
şəbəkəsi enerji daşıyıcıları kimi mühüm məıhsullar üzrə
Azərbaycanın dünyadakı mövqeyini gücləndirən iqtisadi layihələrdir.
Avropa kimi tələbkar və imkanlı bazara çıxmaq heç də hər
istehsalçıya yaxud ixracatçıya nəsib olmur. Sumqayıt Yüksək
Texnologiyalar parkı, Neftçala Sənaye məhəlləsi, Gəncə, Mingəçevir,
Şəki və digər şəhərlərdə yaradılan sənaye mərkəzləri istehsal
etdikləri məhsulların çeşidi və keyfiyyəti ilə dünya standartlarına
tam cavab verir.
Kənd təsərrüfatı sahəsində inkişaf çox böyük sürətlə davam edir.
Ölkənin ərzaq təhlükəsizliyini qarşıya bir məqsəd kimi qoyan
hökumət fermerlərə hər cür kömək edib və məqsədinə çatıb.
Azərbaycan bu sahədə tədricən idxalçı ölkədən ixracatçı ölkəyə
çevrilir. Azərbaycan brendi ilə buraxılan məhsullara dünya
bazarında tələbat ildən-ilə artır.
İqtisadi yüksəlişin əsas qollarından biri ölkəyə valyuta axınını
təmin edən sektorların inkişafıdır. Bu baxımdan fəxrlə deyə bilərik
ki, artıq Azərbaycan öz tərəfdaşları üçün etibarlı nəqliyyat
dəhlizini, bunun üçün lazım olan bütün müasir infrastrukturu
yaratmağa nail olub. Qədim İpək yolunun bərpası və işə salınması
uğurla davam edir. Tezliklə Şərqlə Qərbi birləşdirəcək
Bakı-Tbilisi-Qars dəmiryolu istifadəyə veriləcək. Şimal Buzlu
okeanından Hind okeanına qədər nəhayətsiz bir ərazini əhatə edəcək
Şimal-Cənub nəqliyyat dəhlizinin yaradılması ən yaxın gələcəyin
işidir.
Bütün bu saydıqlarımız Azərbaycan Respublikasının parlayan
iqtisadiyyatının kiçik, amma daim zənginləşən, genişlənən və
gözəlləşən panoramıdır.
N.NOVRUZ